ئاگرەكەی نەخۆشخانەی غاندی لە تاران پاش زیاتر لە دوو كاتژمێر كۆنترۆڵكرا

ئاڤا دیجیتاڵ

ئاگرێكی گەورە لە نەخۆشخانەی غاندی لە تارانی پایتەختی ئێران كەوتەوە، میدیاكانی ئێران دەڵێن "پاش زیاتر لە دوو كاتژمێر ئاگرەكە كۆنترۆڵكراوە و هیچ یەكێك لە نەخۆش و كارمەندانی بەرگری شارستانیی بریندار نەبوون.

چیرۆكی سەرەكی: جەلال مەلەكیی، گوتەبێژی بەرگری شارستانی تاران ڕایگەیاند: ئاگرەكە لەكاتژمێر حەوتی ئێوارەی پێنجشەممە 25-1-2024 كەوتووەتەوە و كارمەندانی نەخۆشخانەكە پەیوەندییان بە ئاگركوژێنەوەوە كردووە.

لێدوانی فەرمی: سیما سادات، گوتەبێژی وەزارەتی تەندروستی ئێران ڕایگەیاند: کەس لە نێو نەخۆشخانەکە بەهۆی ئاگرەکەوە بریندارنەبووە و نەخۆشەكان گواستراونەتەوە بۆ نەخۆشخانەیەكی دیكە. ئاژانسی هەواڵی تەنسیم ئەمەی بڵاوکردووەتەوە.

 ئەوەی لەو بارەیەوە دەگوترێت: میدیاکانی حکومەتی ئێران بڵاویانکردەوە کە دۆسیەی دادگا لەسەر ئاگرکەوتنەوە لە نەخۆشخانەی غاندی تۆمارکراوە، بە فەرمانی عەلی ساڵحی، داواکاری گشتی تاران، جێگری داواکاری گشتی و لێکۆڵەری تایبەت گەیشتوونەتە شوێنی ڕووداوەکە. 

باكگراوند: نەخۆشخانەی غاندی، لە 100 قەرەوێڵە و  17ژووری نەشتەرگەری و 100 قەرەوێڵەی نیشتەجێبوونی تێدایە.