گەندەڵییەکی دوو ملیار دیناریی پارێزگای کەرکووک ئاشکرا دەکرێت

ئاڤا نیوز

لە لایەن دەستەی دەستپاکی عێراقەوە، گەندەڵییەکی نێو پڕۆژەیەکی خزمەتگوزاریی کەرکووک بە بەهای دوو ملیار و 148 ملیۆن و 160 هەزار دینار ئاشکرا دەکرێت.

زانیاریی بەدەستهاتوو: سەرچاوەیەک لە دەستەی دەستپاکی عێراق کە نەیویست ناوی ئاشکرا بکرێت بە پەیامنێری ئاڤا نیوزی لە کەرکووک گوت: ئەمرۆ لە پڕۆژەی ڕێڕەوی خاسە لە پردی غەرناتە بۆ پردی چوار، بەهەدەردانێکی گەورەی پارە و کەمتەرخەمی ئاشکرا بووە.

زانیاریی زیاتر: لە پرۆژەکەدا چەندین گەندەڵی وەک پڕۆسەی پڕکردنەوە، گواستنەوەی کەلوپەل لە پرۆژەی دیکە و بۆیاخکردنی ڕەسیفەکان پێش قیرتاوکردن و چەند کاری دیکە بینراوە.

ئەوەی پێویستە بیزانیت: لە لایەن فەرمانبەرێکی فەرمانگەی باجی کەرکووکەوە نووسراوی ئەستۆپاکی بۆ بەڵێندەرەکە کراوە، بە بێ ئەوەی پشکنینی کۆتایی بۆ کارەکانی پڕۆژەکە بکرێت.