سعودیە: هەركەس بە بێمۆڵەت بچێتە حەج گوناهبارە

ئاڤا نیوز

 
وەزارەتی حەج و عومرەی سعودیە ڕایگەیاند، ماوەی چەند ساڵێکە هەڵمەتێک لە سۆشیاڵ میدیا دەستیپێکردووە بۆ هەڵخەڵەتاندنی ئەو کەسانەی ئارەزووی حەج دەکەن، بەشێوەیەک بە پارەی کەم مۆڵەتی حەجی ساختەیان پێدەفرۆشن.

ڕاگەیێنراوی فەرمی: وەزارەتی حەج و عومرەی سعودیە لە ڕاگەیێنراوێکدا ڕایگەیاند: هاتن بۆ ئەنجامدانی حەج بە وەرگرتنی ڤیزەی حەج لەلایەن لایەنە پەیوەندیدارەکانەوە دەبێت و بە هەماهەنگی لەگەڵ وڵاتان دەکرێت، بەپێچەوانەوە مۆڵەتەکانی دیکە ساختەن و ڕێگەپێدراونین.

ئەوەی پێویستە بیزانیت: وەزارەتی حەج و عومرە چاودێری ڕیکلامەکانی کۆمپانیا ساختەکان، کەمپەین، ئەکاونتەکانی تۆڕە کۆمەڵایەتییەکان دەکەن کە بانگەشەی مۆڵەتدان و حەجی ساختە بە نرخێکی کەم دەکەن.

ئەوەی ئێستا ڕوودەدات: وەزارەتی حەج و عومرە ستایشی هەوڵەکانی دەسەڵاتدارانی عێراقی کرد، لە داخستنی زیاتر لە 25 کۆمپانیای ساختە کە حەجی بازرگانی و ساختە بە هاووڵاتییان دەفرۆشن.

لە لایەکی دیکەوە: ئەنجوومەنی باڵای زانایانی سعودیە ڕایگەیاند: هەرکەسێک بەبێ وەرگرتنی مۆڵەت بچێتە حەج "گوناهبارە"، چونکە کاریگەری لەسەر ڕێکخستنی ژمارەی حاجییان دەبێت کە ساڵانە خۆیان تۆمار دەکەن.