ژوورێکی تایبەت بۆ تابلۆی مۆنالیزا درووست دەکرێت

ئاڤا نیوز

 

مۆزەخانەی لۆڤەر لە پاریس، بەهۆی قەرەباڵغی و نەگونجاوی شوێنەکە، ژوورێکی تایبەت بۆ وێنەی مۆنالیزا دروست دەکات کە بەناوبانگترین تابلۆی جیهانە.

 

بۆچی گرنگە: رۆژانە گەشتیارێکی زۆر سەردانی مۆزەخانەی لۆڤەر دەکەن، بەڵام بەهۆی قەرەباڵغییەوە زۆرجار ناتوانن وێنەیەکی یادگاری لەگەڵ تابلۆی مۆنالیزا بگرن، بەو هۆیەشەوە بەڕێوەبەری مۆزەخانەکە بڕیاریداوە تابلۆکە بگوازرێتەوە بۆ ژوورێکی تایبەت. 

 

لێدوانی فەرمی: لۆرانس دی کار، بەڕێوەبەری مۆزەخانەی لۆڤەر دەڵێت: دەمانەوێت بە باشترین شێوە میوانداری گەشتیارەکان بکەین، ئەم هەنگاوەش وادەکات گەشتیاری زیاتر چاوی بە تابلۆی مۆنالیزا بکەوێت.

 

ژمارەکان وا دەڵێن: رۆژانە 20 هەزار گەشتیار سەردانی مۆزەخانەی لۆڤەر دەکەن و ساڵی ڕابردوو نزیکەی نۆ ملیۆن گەشتیار تەنیا بۆ بینینی تابلۆی مۆنالیزا سەردانی مۆزەخانەکەیان کردووە کە لەلایەن لیۆناردۆ داڤینشی نەخشێنراوە.