لەڕێگەی سکاڵایەک دادگەی فیدراڵی دەتوانێ بڕیارەکانی پێشووی خۆی هەڵبوەشێنێتەوە

ئاڤا نیوز

 

بەپێی ڕێکاری یاسایی هێشتا دەرفەتی ئەوە ماوە، بڕیارەکانی دادگەی فیدراڵی لەبارەی هەڵبژاردنەکانی پەرلەمانی کوردستان هەڵوەشێنرێنەوە.

 

وێنە گەورەکە: نێچیرڤان بارزانی، هەرێمی کوردستان لە بەغدایە و لەگەڵ بەرپرسانی عێراق گفتوگۆی ناڕەزایەتییەکانی پارتی و پێکهاتەکانی کردووە لەبارەی هەڵبژاردنەکانی پەرلەمانی کوردستانەوە.

 

لێدوانی فەرمی: فایەق زێدان، سەرۆکی ئەنجوومەنی باڵای دادوەریی عێراق لە کۆبوونەوەی لەگەڵ سەرۆکی هەرێمی کوردستاندا ڕایگەیاندووە: "ڕۆڵی دەسەڵاتی دادوەری بۆ یەکلاکردنەوەی هەڵبژاردنی پەرلەمانی هەرێمی کوردستان گرنگە".

 

ئەمەش بزانە: لە ڕۆژی 18-4-2024 سەرۆکی هەرێمی کوردستان، سەرۆکی ئەنجوومەنی باڵای دادوەری و سەرۆکی یەکێتیی نیشتمانیی کوردستان کۆبوونەوەیەکی داخراویان لەبارەی بڕیارەکانی دادگەی فیدراڵی کرد.

 

لەلایەکی دیکەوە: ئەیاد کاکەیی، سەرۆکى لقى هەولێرى سەندیکاى پارێزەرانى کوردستان بە ئاڤا نیوزی گوت: "بەپێی یاسا هێشتا دەرفەتی ئەوە ماوە گۆڕانکاری لە بڕیارەکانی دادگەی فیدراڵیدا بکرێت، بەوەی سکاڵایەکی نوێ تۆمار بکرێت و دووبارە خودی دادگە بەهۆی ئەو سکاڵایانەوە بڕیارەکانی پێشووی خۆی هەڵوەشێنێتەوە".

 

باکگراوند: بڕیارە ڕۆژی دەی حوزەیرانی ئەمساڵ هەڵبژاردنی پەرلەمانی كوردستان بكرێت، بەڵام پارتی و زیاتر لە 10 لایەنی سیاسی و پێكهاتەكان، ناڕازین و ئامادە نین بەو شێوەیە بەشداریی بكەن.