ژمارەیەکی دیکەی خێزانی چەکدارانی داعش دەگوازرێنەوە مووسڵ

ئاڤا نیوز

 

ژمارەیەکی دیکە لە خێزانی چەکدارانی داعش لە کەمپی هۆلەوە لە پارێزگای حەسەکەی ڕۆژئاوای کوردستانەوە دەگوازرێنەوە کەمپی جەدعە لە شارۆچکەی گەیارە لە پارێزگای نەنیەوا.

 

لێدوانی فەرمی: "بە یاوەری تیمێکی تایبەتی ئەمنیی عێراقی، دوای دڵنیابوونەوە لە سەلامەتییان، لەم هەفتەیە نزیکەی 200 خێزانی عێراقی لە کەمپی هۆل لە سوریاوە لەڕێگەی وشکانییەوە دەگەنە نەینەوا". بەرپرسێک لە ڕاوێژکاری ئاسایشی نیشتمانیی عێراق ئەمەی بە "عەرەبی جدید"ـی ڕاگەیاندووە.

 

زانیاریی زیاتر: سەرچاوەیەکی دیکە لە وەزارەتی کۆچبەران ئەم زانیارییەی بۆ "عەرەبی جدید" پشتڕاست کردەوە و دەڵێت: "کۆی ژمارەی ئەندامانی خێزانەکە کە بڕیارە لەم هەفتەیەدا بگەڕێنەوە، نزیکەی 200 خێزانن دەبن، بە گشتی ژمارەیان لە 700 کەس زیاترە و زۆربەشیان منداڵ، ژن و بەساڵاچوون".

 

ئەمەش بزانە: نزیکەی حەوت هەزار خێزانی عێراقی کە ژن و منداڵانی چەکدارانی داعشن، لە کەمپی هۆل نیشتەجێن؛ لە ماوەی دوو ساڵدا ئەمە 15ـەمین کاروانە دەگەڕێنەوە عێراق.