ئاڤا نیوز ڕێککەوتنی حەشدی شەعبی و یەکێتی بۆ دابەشکردنی پۆستەکانی شنگال ئاشکرا دەکات

ئاڤا نیوز

 

حەشدی شەعبی و یەکێتی لە هەوڵی ئەوەدان پۆستە ئیدارییەکان لەنێوان خۆیاندا دابەش بکەن، پارتیش هەنگاوەکە بە پێچەوانەی یاسا دەزانێت.

 

وێنە گەورەکە: ماوەی دوو ساڵە قەزای شنگال بێ قایمقامە، محەممەد شیاع سوودانی لە سەردانەکەیدا بۆ پارێزگای نەینەوا، دەسەڵاتی بە ئەنجوومەنی پارێزگاکە دا بۆ پڕکردنەوەی سەرجەم پۆستە ئیدارییەکانی قەزاکە.

 

زانیاریی بەدەستهاتوو: ئاڤا نیوز زانیویەتی، حەشدی شەعبی لەگەڵ یەکێتی لە هەوڵی ئەوەدان پۆستە ئیدارییەکانی ئەنجوومەنی قەزای شنگال پڕ بکەنەوە.

 

زانیاریی زیاتر: ڕێککەوتنەکە بە جۆرێکە پۆستەکانی قایمقامی شنگال و ناحیەی قەیراوان بۆ حەشدی شەعبی بن، لە بەرامبەر ئەوە لە مەخموور پۆستی قایمقام و ناحییەکانی سنونێ و گرعزێر بە یەکێتی بدرێت.

 

لێدوانی فەرمی: سەرچاوەیەک لە ئەنجوومەنی پارێزگای نەینەوا بە ئاڤا نیوزی گوت: دوور لە هەموو ڕێکارە یاساییەکان ئەمڕۆ ئەندامانی ئەنجوومەنەکە بە کورتەنامەیەک ئاگادار کراونەتەوە کە سبەی دووشەممە کاتژمێر 12ـی نیوەڕۆ ئەنجوومەنەکە کۆ دەبێتەوە بەبێ ئەوەی ئەندامەکان لە کارنامەکەی ئاگادار بن.

 

لەلایەکی دیکەوە: پێشتر نازم ھەرکی، بەرپرسی لقی 17ـی پارتی دیموکراتی کوردستان لە شنگال  ڕایگەیاندبوو: "پۆستە ئیدارییەکانی شنگال بڕگەیەکە لە ڕێککەوتنی شنگال لەنێوان حکومەتی عێراق و هەرێمی کوردستان کە ساڵی 2020 کراوە، ئێمە لەگەڵ ئەو شێوازەی دیاریکردنی قایمقامی قەزای شنگال لەڕێگەی ئەنجوومەنی پارێزگاوە نین، ئەوەی ئەوان دەیکەن دژی یاسا و ڕێککەوتنە".

 

کاریگەری و لێکەوتەکان: زۆربەی خەڵکی شنگال هێشتا لە کەمپەکانی هەرێمی کوردستاندان و بەهۆی گرووپە چەکدارەکان ئاوارەیییان هەڵبژاردووە لە جیاتی گەڕانەوە، بۆ ئەوەی نەچنە ژێرباری ئەو گرووپە چەکدارانە کە بە نایاسایی لە قەزاکەدان، ئەم هەنگاوەش لە بەرژەوەندیی خەڵکەکەدا نییە.