دادگەی فیدراڵی سکاڵایەک دژی مووچەخۆرانی هەرێمی کوردستان ڕەتدەکاتەوە

ئاڤا نیوز 

دادگەی باڵای فیدراڵی عێراق، سكاڵای پەرلەمانتارێكی ڕەتكردەوە كە لەدژی ناردنی زیاتر لە دوو تریلیۆن دینار بۆ هەرێمی كوردستان، لەسەر سەرۆكوەزیرانی عێراق تۆماری كردبوو.

چیرۆكی سەرەكی: دادگەی باڵای فیدراڵی عێراق، ئەو سكاڵایەی ڕەتکردەوە کە لەسەر محەممەد شیاع سوودانی سەرۆكوەزیرانی عێراق تۆمارکرابوو تایبەت بە ناردنی سێ گوژمەی 700 ملیار دیناری بۆ دابەشکردنی مووچەی فەرمانبەرانی هەرێمی کوردستان.

ڕاگەیێنراوی فەرمی: لە دانیشتنی ئەمڕۆ سێشەممە، دادگەی باڵای فیدراڵی عێراق سکاڵای مستەفا سەنەد پەرلەمانتاری عێراقی ڕەتکردەوە و ڕایگەیاند، سکاڵاکەر سیفەتی یاسایی تیێدا نەبووە.

زانیاریی زیاتر: بەغدا ساڵی ڕابردوو دوو تریلیۆن و 100 ملیار دیناری بە قەرز بۆ هەرێم ناردبوو لەپێناو دابەشکردنی مووچەی مووچەخۆرانی هەرێمی کوردستان.

وێنە گەورەكە: ئەو پەرلەمانتارە سەربەخۆیەی شیعەكان، چەندین جار سكاڵای دژی ناردنی پارە و شایستە داراییەكان بۆ هەرێمی كوردستان تۆماركردووە، بەڵام بەشێكی زۆر لە سكاڵاكانی بەهۆی نایاسایی بوونی ڕەتدەكرێنەوە.