سەرۆک بارزانی پێشوازی لە خانەوادەی پێشڕەو دزەیی دەکات

ئاڤا دیجیتاڵ


سەرۆک بارزانی لە پێشوازی خانەوادەی پێشڕەو دزەیی رایگەیاند، هێرشە مووشەکییەکەی ئێران زوڵمێکی گەورە بوو بەرامبەر ئێوە و خەڵکی کوردستان کرا.

چیرۆکی سەرەکی: رۆژی شەممە 27-1-2024، سەرۆک مەسعود بارزانی لە سەڵاحەددین پێشوازی لە خانەوادەی پێشڕەو دزەیی کرد، کە ئێران بە ژمارەیەک مووشەک ماڵەکەی بۆردوومان کرد و بەهۆیەوە خۆی و کچێکی تەمەن 12 مانگی گیانی لەدەستدا .

لێدوانی فەرمی: لە دیدارەکەدا سەرۆک بارزانی دووبارە پرسە و سەرەخۆشی خۆی پێڕاگەیاندوون و، هیوای چاکبوونەوەی بۆ برینداران خواستووە. هەروەها جەختیکردووەتەوە کە "ئەو تاوانە زوڵمێکی گەورە بوو بەرامبەر خانەوادەی شەهید پێشڕەو دزەیی و خەڵکی کوردستان کرا".


زانیاری زیاتر: لە دیدارەکەدا موحسین دزەیی، کەسایەتی و تێکۆشەری دێرینی کوردستان، سوپاسی پشتگیری و هەڵوێستی سەرۆک بارزانی کردووە کە هەر لە ڕۆژی یەکەمەوە ئەو کارەساتەی بە خەمی خۆی زانیوە، سوپاسی ئامادەبوونیشی لە مەراسیمی بەخاکسپاردنی پێشڕەو دزەیی و کچەکەی کردووە.

لەلایەکی دیکەوە: عەبدوڵلا مەجید دزەیی، بەناوی خۆی و خانەوادە و هەر سێ برای پێشڕەو، پێزانینی بۆ هاوسۆزیی سەرۆک نیشانداوە و، بەڵێنی ئەوەشی داوە هەموویان لەسەر رێچکەی شەهید پێشڕەو دزەیی بۆ ئاوەدانی و خزمەتکردنی خەڵکی کوردستان بەردەوام دەبن.

باکگراوند: درەنگانی شەوی دووشەمە 15-01- 2024، لەلایەن سوپای پاسدارانی ئێران بە چەند مووشەکێكی بالیستیک ماڵی سەرمایەداری دیاری کوردستان پێشڕەو دزەیی کرایە ئامانج، لە ئەنجامدا خۆی و ژینای کچی کە تەمەنی 12 مانگ بوو، لەگەڵ هاوڕێیەکی سەرمایەداری و خزمەتگوزارێکی گیانیان لەدەستدا، شەش کەسیش برینداربوون، تاوەکو ئێستاش یەکێک لە خزمەتگوزارەکانی بێشەروشوێنە، هاوژینی  و دوو کوڕەکەشی لەنێو بریندارەکانن و ئێستا لە وڵاتی ئیمارات چارەسەریان بۆ دەکرێت .

رووداوەکە لەسەر ئاستی کوردستان و عێراق کاردانەوە فراوان و تووندی لێکەوەتەوە و چەندین وڵاتیش سەرکۆنەیان کرد. دوای رووداوەکەش لە پەیامێکدا سەرۆک بارزانی رایگەیاند: پەیامم بۆ ئەنجامدەرانی پەلاماری مووشەک و درۆنەکانی ئێران ئەوەیە، شەهیدکردنی ژن و منداڵ و خەڵکی سڤیلی ئێمە هیچ شانازی و سەربڵندی بۆ ئێوە تێدا نیە، گوتیشی "دەتوانن بمانکوژن، بەڵام دڵنیابن ناتوانن ئیرادەمان لێ بستێنن".