فیدراسیۆنی پەنابەرانی عێراقی لە بەریتانیا: پەنابەران ترسیان هەیە بچنە بنکەکانی پۆلیس

ئاڤا نیوز

 

ماوەی چوار ڕۆژە وەزارەتی ناوخۆی بەریتانیا، بە چڕی دەستیکردووە بە دەستگیرکردنی ئەو پەنابەرانەی کە بە نایاسایی لە نۆکەندی ئینگلیزەوە پەڕیونەتەوە نێو خاکی بەریتانیا.

 

وێنە گەورەکە: فیدراسیۆنی پەنابەرانی عێراقی لە بەریتانیا کەمپەینێکی چڕیان دەستپێکردووە، خۆپێشاندانەکە لەبەردەم ماڵی سەرۆکوەزیرانی بەریتانیایە، نوێنەری زۆربەی ڕێکخراوەکانی مافی پەنابەران و ژمارەیەک پەرلەمانتاریان لەگەڵە و داوای ڕاگرتنی پڕۆژەیاسای زۆرەملێی ڕواندا دەکەن.

 

ئەوەی پێویستە بیزانیت: زۆرێک لەو پەنابەرانەی مافی پەنابەرێتیان نییە و دەچنە بنکەکانی پۆلیس بۆ واژۆکردن، بەمەبەستی ڕەوانەکردنیان بۆ ڕواندا دەستگیردەکرێن.

 

زانیاریی زیاتر: زیاتر لە پێنج هەزار و 700 پەنابەر نامەیان بۆ چووە کە لە داهاتوودا ڕەوانەی ڕواندا دەکرێن، ئەو پەنابەرانەی نامەیان لەلایەن وەزارەتی ناوخۆی بەریتانیاوە پێگەیشتووە داوا لە فیدراسیۆنی پەنابەرانی عێراقی لە بەریتانیا دەکەن ڕێگەچارەیەکیان بۆ دابنێن.

 

لێدوانی فەرمی: دەشتی جەمال، سەرۆکی فیدراسیۆنی پەنابەرانی عێراقی لە بەریتانیا بە کوردستان حەسەنی پەیامنێری دیبلۆماسی ئاڤا نیوزی گوت: وێڕای ئەوەی لە ساڵی 2022 توانیمان یەکەم کاروانی 76 پەنابەر کە بڕیاربوو بەزۆر بیاننێرنە ڕواندا ڕابگرین.

 

ئەوەی ئێستا ڕوودەدات: سەرەڕای ئەوەی دادگەی باڵای بەریتانیا و دادگەی مافی مرۆڤ لە ئەوروپا پڕۆژەیاسای رەوانەکردنی پەنابەران بۆ ڕواندا بە نایاسایی لە قەڵەم داوە، بەڵام سەرۆکوەزیرانی بەریتانیا پەسەندی کردووە.