ئێران بودجەی ڕاگەیاندن زیاد دەکات

ئاڤا دیجیتاڵ

 

ئێران لە بودجەی ساڵی دارایی داهاتوویدا بودجەی دامەزراوەی میدیایی وڵاتەکەی بۆ سێ هێندە زیاد کرد و ئەنجوومەنی شوورای ئیسلامیی وڵاتەکەش پەسەندی کردووە.

 

چیرۆکە سەرەکییەکە: ئەنجوومەنی شوورای ئیسلامیی ئێران لە گفتوگۆی بودجەی ساڵی داهاتوودا بودجەی دامەزراوەی دەنگ و رەنگی کۆماری ئیسلامیی ئێرانی بۆ سێ هێندە زیاد کرد. بەپێی زانیارییەکان بودجەکەی 24 ملیار تمەنە و ئەنجوومەنەکەش بڕە پارەکەی پەسەند کردووە.

 

لێدوانی فەرمی: جەبار کوچەکینەژاد، ئەندامی ئەنجوومەنی شوورا و ئەندامی لیژنەی ئامادەکردنی بودجە، بەرگری لە بڕیاری سێ هێندەکردنی ودجەی ڕاگەیاندن لە ئێران کرد و ڕایگەیاند: "ئێمە کەوتووینەتە نێو شەڕێکی میدیاییەوە و دەبێت ڕاگەیاندن بەهێز بکەین، پێویستە بودجەی ڕاگەیاندن زۆر بێت تاوەکو بتوانێت رووبەڕووی شەڕی میدیای دەرەکی ببێتەوە". گوتیشی: "پێویستە ئەنجوومەنی شوورا یارمەتییەکی تایبەتی راگەیاندن، دامەزراوە ئاسایشی و هەواڵگرییەکان بدات".

 

زانیاریی زیاتر: جگە لە دامەزراوەی دەنگ و ڕەنگی کۆماری ئیسلامیی ئێران، بودجەی دامەزراوە سەربازی و ئایینییەکانیش بەراورد بە ساڵی پێشوو زیاد کراون.