ئەمریكا 12 هێلیكۆپتەر بە عێراق دەفرۆشێت و پەرلەمانیش لێكۆڵینەوە دەكات

ئاڤا نیوز

ئەمریكا 12 هێلیكۆپتەر بە عێراق دەفرۆشێت، ئەندامێكی لیژنەی ئاسایش و بەرگریی پەرلەمانی عێراقیش دەڵێت "لیژنەكەیان پێشتر ئاگاداری ئەو گرێبەستە نەبووە و لێكۆڵینەوە دەكات".

لێدوانی فەرمی: تەحسین خەفاجی، گوتەبێژی فەرماندەیی ئۆپەراسیۆنە هاوبەشەکانی سوپای عێراق ڕایگەیاند: عێراق گرێبەستی لەگەڵ ئەمریکا کردووە بۆ کڕینی 12 هێلیكۆپتەری جۆری بیڵ 412، نۆ فڕۆکەی جۆری بیڵ 407.هەروەها ئەمریکا بە دیاری هێلیكۆپتەرێكی جۆری بێل 505، پێنج فڕۆکەی جۆری بیڵ 412 بۆ مەشق و ڕاهێنان پێشکەشی عێراق کردووە.

زانیاریی زیاتر:گرێبەستی کڕینی ئەم هێلیكۆپتەرانە لەکاتی سەردانەکەی محەمەد شیاع سوودانی سەرۆکوەزیرانی عێراق بووە بۆ واشنتن.

ئەوەی لەوبارەیەوە دەگوترێت: ئەندامێکی لیژنەی ئاسایش و بەرگری پەرلەمان کە نزیکە لەچوارچێوەی هەماهەنگی گوتویەتی "لیژنەکەیان هەوڵدەدات لێپرسینەوە لەگەڵ ئەوبەرپرسانە بکات کە گرێبەستەکەیان کردووە، لەبەر ئەوەی لیژنەکەیان پێشتر ئاگاداری نەبووە".

وێنە گەورەکە: ڕۆژی 13ـی ئەم مانگە، محەممەد شیاع سوودانی سەرۆكوەزیرانی عێراق، بە سەردانێكی فەرمی چووە ئەمریكا و دۆسییەی ئەمنی، ئابووری، بانكەكان، وزە و ژینگە، لە ئەجێندای کۆبوونەوەکانی بوو.

ئەوەی پێویستە بیزانیت: هێلیكۆپتەری جۆری بیڵ 412 بۆ كاری سەربازی و مەدەنی بەكاردێت و لەساڵی 1981 ەوە لە لایەن كۆمپانیای "بیڵ" ەوە دروستكراوە.