گرووپێكی عێراقی هێرش دەكاتە سەر بنكەیەكی سوپای ئیسرائیل

ئاڤا نیوز

گرووپێكی چەكداری عێراقی ڕایگەیاند بنكەیەكی ئاسمانی سوپای ئیسرائیلیان لە ناوچەی ئیلات بە درۆن كردووەتە ئامانج.

ڕاگەیێنراوی فەرمی: "مقاوەمەی ئیسلامی عێراق" ڕایگەیاند: بەیانی ئەمڕۆ هێرشیان كردووەتە سەر بنكەیەكی ئاسمانی سوپای ئیسرائیل لە ناوچەی ئیلات و هێرشەكە لە ڕێگەی درۆنەوە بووە.

ئەوەی پێویستە بیزانیت: ئەم هێرشە لەكاتێكدایە، هەمان گرووپ دوێنێ ڕایگەیاند بەندەری حەیفایان لە ئیسرائیل بە مووشەكی كرووز كردووەتە ئامانج، ئەویش بەگوتەی خۆیان وەك وەڵامێك بۆ هێرشەكانی ئیسرائیل بۆسەر غەززە.

وێنە گەورەكە: لە حەوتی ئۆكتۆبەری ساڵی ڕابردووەوە، كە شەڕی نێوان ئیسرائیل و حەماس دەستیپێكردووە، گرووپە چەكدارە شیعەكان لە عێراق و سووریا و لوبنان و یەمەن، بەردەوام بە مووشەك و درۆن هێرش دەكەنە سەر ئیسرائیل، لەبەرامبەریشدا ئیسرائیل ئەو گرووپانە لەناوخۆی وڵاتەكانیان دەكاتە ئامانج.