دادگەی فیدراڵی دادبینی بۆ سکاڵا لەسەر دەرکردنی هێزەکانی هاوپەیمانان دەکات

ئاڤا نیوز

 

دادگەی فیدراڵی، دادبینی بۆ دوو سکاڵا لەسەر دەرکردنی هێزەکانی هاوپەیمانان و قەرەبووی حکومەتی عێراق دەکات.

 
وێنە گەورەکە: بەشێکی لایەنە شیعییەکان داوای دەرکردنی هێزەکانی هاوپەیمانان لە عێراق دەکەن و دوو ئەندامیان لە ئەنجوومەنی نوێنەران لە دادگەی فیدراڵی لەسەر مانەوەی هێزەکانی هاوپەیمانان و ڕادەستکردنەوەی بارەگاکانیان سکاڵایان تۆمار کردووە.

 

زانیاریی بەدەستهاتوو: بە گوێرەی خشتەی کۆبوونەوەکانی ئەمڕۆی دادگەی فیدراڵی، سکاڵای یەکەم لە لایەن باسم خەشان، ئەندامی ئەنجوومەنی نوێنەرانی عێراق تۆمار کراوە و سکاڵای دووەم لەلایەن مستەفا جەبار سەنەد تۆمار کراوە، داوا دەکەن هێزەکانی هاوپەیمانان لە عێراق بچنە دەرەوە و قەرەبووی بەکارهێنانی ئەو شوێن و دامەزراوانە بکەنەوە کە چەند ساڵە لێی دەمێننەوە.

 
ئەمە لە کاتێکدایە: سەرۆکوەزیرانی عێراق لەمیانی سەردانەکەی بۆ واشنتن، پرسی کشانەوەی هێزەکانی هاوپەیمانانی یەکلا کردەوە و گوتی، "هیچ هێزێکی شەڕکەر لەسەر خاکی عێراق نەماوە تاوەکو بکشێتەوە".