سەرۆکوەزیران بارزانی هێرشەکەی سەر هێزەکانی ئەمریکا لە ئوردن سەرکۆنە دەکات

ئاڤا دیجیتاڵ


لە کاردانەوەی هێرشەکەی سەر بنکەی سەربازی ئەمریکا لەسەر سنووری ئوردن و سووریا، سەرۆکوەزیران بارزانی لە پەیامێکدا هێرشەکەی بەتوندی سەرکۆنەکرد.

چیرۆکی سەرەکی: ئێوارەی دوێنێ یەکشەممە لە چوارچێوەی بەردەوامی بەئامانجگرتنی بنکە سەربازییەکانی ئەمریکا لە ناوچەکە، لەلایەن گرووپە چەکدارەکانەوە بنکەی سەربازی تەنف-ی ئەمریکا لە سنووری ئوردن و سووریا کرایە ئامانج، بەهۆیەوە سێ سەرباز کوژران و زیاتر لە 30 سەربازیش برینداربوون.

لێدوانی فەرمی: لەبارەی هێرشەکەوە مەسرور بارزانی، سەرۆکوەزیرانی هەرێمی کوردستان پەیامێکی بڵاوکردەوە و رایگەیاند، "بەتوندترین شێوە هێرشە ترسنۆکانەی دوێنێ بۆ سەر هێزەکانی ئەمریکا لە ئوردن سەرکۆنە دەکەم".

سەرۆکوەزیران بارزانی لە پەیامەکەیدا هاوخەمی بۆ حکومەت و خەڵکی ئەمریکا "لەم کاتە سەختەدا" دەربڕیوە.

 

باکگراوند: ئێوارەی رۆژی یەکشەممە 28-11-2024، بەهۆی هێرشێکی درۆنی بۆ سەر پێگەیەکی سەربازی هێزەکانی ئەمەریکا لە له‌سه‌ر سنووری نێوان ئوردن و سووریا، سێ سەرباز کوژران و 34 سەربازیش برینداربوون، گرووپە چەکدارەکانی عێراقیش بەرپرسیارێتی هێرشەکەیان لەئەستۆگرت.

ئەوەی پێویستە بیزانیت: بنكەی سەربازی تەنەف ده‌كه‌وێته‌ سێگۆشه‌ی سنووری نێوان عێراق و سووریا و ئوردن، نزیكەی سێ هەزار سەربازی ئەمریكای لێیە و لە شەڕی داعشدا چالاكترین بنكەی ئەمریكا بوو لە رۆژهەڵاتی ناوەڕاست.

ژمارەکان وادەڵێن: لە سەرەتای هەڵگیرسانی شەڕی نێوان حەماس و ئیسرائیل لە كەرتی غەزە لە مانگی 10ی ساڵی رابردوو، نزیکەی 160 جار هێرشكراوەتە سەر هێزەکانی ئەمریكا لە سووریا و عێراق و ئوردن.