كۆمەڵەی تالاسیمیای هەولێر داوایەک لە سەرۆكوەزیران بارزانی دەکات

ئاڤا نیوز  

بەرپرسی ڕاگەیاندنی کۆمەڵەی تالاسیمیای هەولێر ڕایدەگەیێنێت، تەنیا لە پارێزگای هەولێر زیاتر لە 990 تووشبووی تالاسیمیا تۆمار کراون، داوا لە سەرۆکوەزیران بارزانی دەکات "وەکو دڵسۆزو خەمخۆرێک" بە دەنگ ئازارەکانیانەوە بچێت.

لێدوانی فەرمی: سروە عەلی، بەرپرسی ڕاگەیاندنی کۆمەڵەی تالاسیمیای هەولێر ڕایگەیاند: "لە نەخۆشخانە چەندین کەموکوڕیمان هەیە، چەندین دەرمان و پێداویستیمان کەمە، دەرزیمان هەیە پەپوولەکەی لەگەڵ نییە، نەخۆش خۆی دەبێت بگەڕێت لە شارەکان و وڵاتان تاوەکو دەستی دەکەوێت".

زانیاریی زیاتر: بە گوتەی سروە عەلی، سەرەڕای کەموکوڕییەکانیان لە پێداویستیی دەرمان، "گەندەڵی" لە ناو کۆمەڵەکەیان هەیەو دەپرسێت " بۆچی نزیکەی 10 ساڵ زیاترە هەڵبژاردنی کۆمەڵەی تالاسیمیا نەکراوە؟".

لە لایەکی دیکەوە: بەرپرسی ڕاگەیاندنی کۆمەڵەی تالاسیمیای هەولێر، لەسەر ئەو "گەندەڵی"ـیانە داوا لە سەرۆکوەزیران بارزانی دەکات بۆخۆی بێتە سەر خەت و دەڵێت: "تکایە وەکو برا گەورەیەک، وەکو دڵسۆز و خەمخۆرێکی ئێمە بە دەنگ ئازارەکانمانەوە وەرە".