وەزارەتی بازرگانیی عێراق: ئەمساڵ نزیکەی 7 ملیۆن تۆن گەنم لە جووتیاران وەردەگرین

ئاڤا نیوز 

 

بەڕێوەبەری گشتیی کۆمپانیای بازرگانی و دانەوێڵەی عێراق ڕایدەگەیێنێت، وەزارەتی بازرگانی بەنیازە بۆ ئەم وەرزە نزیکەی حەوت ملیۆن تۆن لە بەرهەمی گەنمی جووتیارانی ناوخۆ وەربگرێت.

 

بۆچی گرنگە: بە تەنیا بەرهەمی جووتیارانی هەرێمی کوردستان زیاتر لە یەک ملیۆن و نیو تۆن دەبێت. بەغدا پێشنیازی وەرگرتنی بڕێکی گەنمی جووتیارانی کوردستانی کردووە، بەڵام وەزارەتی کشتوکاڵی حکومەتی هەرێمی کوردستان ئەو پێشنیازەی ڕەت کردووەتەوە. 

 

لێدوانی ڕۆژنامەوانی: حەیدەر گەرعاوی، بەڕێوەبەری گشتیی کۆمپانیای بازرگانی و دانەوێڵە ڕایگەیاند: بەپێی خەمڵاندنەکانی وەزارەتی کشتوکاڵ، بەنیازین لەم وەرزەدا شەش تاوەکو حەوت ملیۆن تۆن گەنم وەربگرین". گەرعاوی ئەم قسانەی لەمیانی کۆنگرەیەکی ڕۆژنامەوانی لە پارێزگای کەرکووک کرد.

 

زانیاریی زیاتر: گەرعاوی،  گوتی: "بڕی 30 ملیار دینارمان بۆ خەزێنەی سایلۆی کەرکووک تەرخان کردووە، لەمڕۆوە چەکی پارە بەو جووتیارانە دەدرێت کە گەنمەکانیان ڕادەستی سایلۆکان دەکەن".

 

ئەمەش بزانە: بڕیارە شاندێکی وەزارەتی کشتوکاڵ و سەرچاوەکانی ئاو بەمەبەستی یەکلاییکردنەوەی وەرگرتنی گەنمی جووتیاران سەردانی بەغدا بکات.