دژی لەسێدارەدانی چوار گەنجی کورد لە ڕۆژهەڵاتی کوردستان مانگرتن دەستپێدەکات

ئاڤا دیجیتاڵ

دژی لەسێدارەدانی چوار گەنجی کورد لەلایەن ئێرانەوە، لە بەشێکی شارەکانی ڕۆژهەڵاتی کوردستان مانگرتنی بەربڵاوی کاسبکاران و هاووڵاتیان دەستیپێکردوە و بازاڕەکانیان داخستووە.

چیرۆکی سەرەکی: دوێنێ دووشەممە ڕێکخراوەکانی مافی مرۆڤ لە ڕۆژهەڵاتی کوردستان، ڕاگەیێنراوێکی هاوبەشیان بڵاوکردەوە و داوایان کرد بە مانگرتنی گشتی و سەرتاسەری، لەسێدارەدانی چوار بەندکراوی سیاسیی کورد سەرکۆنە بکەن، ئەمڕۆش لە بەشێک لە شارەکان مانگرتنەکە دەستیپێکردووە.

لێدوانی فەرمی: ئەمڕۆ سێشەممە 30-1-2024لە هەریەک لە شارەکانی سنە، مەهاباد، بۆکان، سەقز و بەشێک لە شارەکانی دیکەی ڕۆژهەڵاتی کوردستان، لەژێر ناوی "سەرکۆنەی لەسێدارەدانی چوار گەنجی سیاسیی کورد و زیاتربوونی ڕێژەی لەسێدارەدانەکان لە ڕۆژهەڵاتی کوردستان لەلایەن ئێرانەوە" مانگرتنی بەربڵاوی کاسبکاران و دووکانداران دەستیپێکردووە.

ئەوەی پێویستە بزانیت: چوار کوردی رۆژهەڵاتی کوردستان بە ناوەکانی پژمان فاتیحی تەمەن 29 ساڵ و خەڵکی شاری کامێران، موحسین مەزڵووم تەمەن 27 ساڵ و خەڵکی شاری مەهاباد، وەفا ئازەربار تەمەن 26 ساڵ و خەڵکی شاری بۆکان، محەممەد (هەژیر) فەرامەرزی تەمەن 28 ساڵ و خەڵکی دێولان، کە 23-7-2022 لەلایەن دەزگا ئەمنییەکانەوە دەستگیرکرابوون، بەیانی ڕۆژی دووشەممە 29-1-2024 لەسێدارەدانیان لەلایەن ئێرانەوە راگەیێنرا.

گۆشەیەکی دیکە: بەپێی ڕێکخراوی هەنگاو بۆ مافەکانی مرۆڤ کە ڕێکخراوێکی چالاکی ڕۆژهەڵاتی کوردستانە، ناوەندە ئەمنییەکانی ئێران تەرمی ئەو چوار گەنجە سیاسییە کوردەیان ڕادەستی بنەماڵەکانیان نەکردووەتەوە و، پێیان ڕاگەیاندوون خۆیان بە نهێنی لە شوێنێکی نادیار بەخاکیان دەسپێرن.

زانیاری زیاتر: ئەو گەنجە کوردانە لە ماوەی 18 مانگ دەستبەسەربوونیان مافی دەستڕاگەیشتن بە پارێزەر و چاوپێکەوتن لەگەڵ بنەماڵە و کەسوکاریان، تەنانەت پەیوەندیی تەلەفۆنیشیان نەبووە، هەر چواریان پێشمەرگەی کۆمەڵەی شۆڕشگێڕی زەحمەتکێشانی کوردستان بوون، لە 18-9-2023 لەلایەن دادگای شۆڕشی تارانەوە بەتۆمەتی "هاوکاری و سیخوڕی بۆ ئیسرائیل" سزای لە سێدارەیان بەسەردا سەپێنرابوو.

بۆچوونی بەرامبەر: کۆمەڵەی شۆڕشگێڕی زەحمەتکێشانی کوردستانی ئێران و کەسوکاریان ئەو تۆمەتەی وەزارەتی ئیتڵاعاتی ئێرانیان رەتکردەوە. لە کاتی دەرکردنی سزاکەشدا ناڕەزایەتی زۆری رێکخراوەکانی مافی مرۆڤ و چالاکڤانانی سیاسی و مەدەنی لێکەوتەوە.


باکگراوند: بەپێی ئامارەکان، ساڵی ڕابردوو لە سەرجەم زیندانەکانی ئێران سزای لەسێدارەان بەلایەنی کەمەوە بەسەر 829 بەندکراو  جێبەجێکراوە، شەش لە بەندکراوەکانیش لە شوێنی گشتیدا لەسێدارەدراون.