سەرقاڵکردنی منداڵان بە مۆبایل لە کاتی نانخواردن کاریگەریی نەرێنی لەسەر تەندروستییان دەبێت

ئاڤا نیوز

 

لە توێژینەوەیەکدا دەرکەتووە، سەرقاڵبوونی منداڵ بە مۆبایل و سەیرکردنی تەلەفیزیۆنەوە لەکاتی خواردن، کاریگەری نەرێنی لەسەر تەندروستی هەیە.

 

ڕاگەیێنراوی فەرمی: توێژەرانی زانکۆی مینهۆی پورتوگالی بۆیان دەرکەوتووە، ئەو منداڵانەی ئامێرە زیرەکەکان بەکاردەهێنن یان سەیری تەلەفیزیۆن دەکەن لە کاتی نانخواردندا، ئەگەری زیادبوونی کێشیان بە ڕێژەی %15 زیاترە بە بەراورد بەو منداڵانەی کە بەدەم ئامێرە زیرەکەکانەوە نان ناخۆن. 

 

ئەوەی پێوستە بیزانیت: تیمێکی زانکۆکە لێکۆڵینەوەیان لە خووی خواردنی 735 منداڵ کردووە، کە تەمەنیان لە نێوان شەش بۆ 10 ساڵدایە و پرسیاریان لە منداڵەکان و دایک و باوکیان کردووە، لەبارەی ئەو خواردنانەی لە ماوەی 24 کاتژمێری ڕابردوودا خواردوویانە.

 

کاریگەری و لێکەوتەکان: لە توێژینەوەکەدا دەرکەوتووە، کاتێک منداڵان سەیری تەلەفیزیۆن یان مۆبایل دەکەن و نان دەخۆن، بەردەوام دەبن لە خواردن، چونکە شاشەکان سەرقاڵیان دەکەن و هەست بە تێربوون ناکەن.