هۆشداری لە داڕمانی لەناکاوی نرخی زێڕ دەدرێت

ئاڤا نیوز

 

ئەندامێکی سەندیکای زێڕنگەرانی هەولێر بەرزبوونەوەی نرخی زێڕ بەو ڕێژە بەرزە بە "ناواقیعی" و دەبات و پێشبینی دەکات کە داڕمانێکی گەورە لە نرخی زێڕ ڕووبدات.

 

لێدوانی فەرمی: سەفین وەرتی، ئەندامی سەندیکای زێڕنگرانی هەولێر بە ئاڤا میدیای ڕاگەیاند: بە بەراورد بە ڕۆژی سێشەممە، ئەمڕۆ ئۆنسەیەک زێڕ 44 دۆلار و مسقاڵێک زێڕ 10 هەزار دینار لە نرخیان بەرزبووەتەوە.

 

زانیاریی زیاتر: لەگەڵ کرانەوەی بۆرسە لە ڕۆژی دووشەممە تاوەکو ئەمڕۆ چوارشەممە، یەک ئۆنسە زێڕ 171 دۆلار و یەک مسقاڵ زێڕ 25 هەزار دینار لە نرخیان بەرزبووەتەوە.

 

لەلایەکی دیکەوە: ئەندامەکەی سەندیکای زێڕنگرانی هەولێر دەڵێت: نرخی ئێستای زێڕ واقیعی نییە و فەیکە، چونکە بەگوێرەی هەموو لێکدانەوەکانی شارەزایانی بواری زێڕ، بەهۆی چارەسەری گرفتەکانی نێوان بەشێک لە وڵاتان هۆکارێک نەماوە بۆ بەرزبوونەوەی نرخی زێڕ، بۆیە پێشبینی دەکرێت داڕمانێکی گەورە و لە ناکاو لە نرخی زێڕ ڕووبدات.

 

ئەوەی پێویستە بیزانیت: نرخی زێڕ لە بازاڕەکاندا ئێستا بەم جۆرەیە:-

-یەک ئۆنسی زێڕ بە چوار هەزار و 188 دۆلارە.
-مسقاڵێک زێڕ عەیار 22 بە 900 هەزار دینارە.
-مسقاڵێک زێڕ عەیار 21 بە 860 هەزار دینارە.
-مسقاڵێک زێڕ عەیار 18 بە 737 هەزار دینارە.