ئاڤا نیوز ناوەڕۆکی سەردانەکەی سەرۆکی هەرێمی کوردستان بۆ بەغدا ئاشکرا دەکات

ئاڤا نیوز

 

گوتەبێژی سەرۆکایەتیی هەرێم ڕایدەگەیێنێت، پرسی هەڵبژاردن، هەمواری بودجە، کێشەکانی مووچەی فەرمانبەران و گەنمی جووتیاران بەشێک دەبن لە ناوەڕۆکی گفتوگۆکانی سەرۆکی هەرێم لە بەغدا.

 

وێنە گەورەکە: بڕیارە ئێوارەی ئەمڕۆ 14-5-2024 نێچیرڤان بارزانی، سەرۆکی هەرێمی کوردستان بە سەردانێکی فەرمی بگاتە بەغدا، لەگەڵ سەرۆکوەزیران و سەرۆکی ئەنجوومەنی دادوەری و لایەنەکانی دیکەی عێراق کۆببێتەوە.

 

لێدوانی فەرمی: دڵشاد شەهاب، گوتەبێژی سەرۆکایەتیی هەرێمی کوردستان بە ئاڤا نیوزی ڕاگەیاند: "ناوەڕۆک و تەوەری کۆبوونەوەکان لەسەر پرسەکانی هەڵبژاردن، هەمواری بودجە و تێچووی بەرهەمهێنانی نەوت کە ناکۆکی لەسەرە دەبێت".

 

ئەوەی پێویستە بیزانیت: کۆتایی هێنان بەو کێشانەی لە بابەتی مووچەی فەرمانبەران هەیە، شایستە داراییەکانی دیکەی هەرێمی کوردستان تەوەرێکی دیکەی گفتوگۆکان دەبن، بابەتی گەنمی جووتیاران لەم سەردانەدا باس دەکرێت.

 

هۆکارە زانراوەکان: هەڵبژاردنی سەرۆکی پەرلەمانی عێراق و پەرلەمانی کوردستان چەند پرسێکی دیکەیە کە پێویستی بە ئامادەیی هەرێمی کوردستانە، بۆیە سەرۆکی هەرێمی کوردستان لەم کاتەدا سەردانەکەی بۆ بەغدا ئەنجامدا.