پێشنیازێکی نوێ بۆ چارەسەرکردنی کێشەی زەوییەکانی گوندی پەلکانە دەکرێت

ئاڤا نیوز

 

پەرلەمانتارێکی ئەنجوومەنی نوێنەرانی عێراق لەبارەی کێشەی گوندی پەلکانە ڕایدەگەیێنێت، پێشنیازکراوە هیچ لایەک زەوییەکان نەکێڵن، تاوەکو بە یاسا کێشەکانیان چارەسەر دەکەن.

 

وێنە گەورەکە: لە دوای ڕووداوەکانی 16ـی ئۆکتۆبەرەوە، بەشێوەیەکی چڕ تەعریب لە کەرکووک دەستی پێکرد، جارێکی دیکە عەرەبی هاوردە لە سەرگەڕان و گوندەکانی دیکە دەستیان بە داگیرکردنی زەوییە کشتوکاڵییەکانی کورد کرد.

 

چیرۆکی سەرەکی: لەبارەی کێشەکانی پەلکانە و چارەسەرکردنی دۆخەکە، شاندێکی پەرلەمانی عێراق سەردانی ناوچەکەی کردووە و لەگەڵ نوێنەری عەرەبەکانی گوندەکانی پەلکانە کۆبووەوە.

 

لێدوانی فەرمی: سەباح حەبیب، ئەندامی ئەنجوومەنی نوێنەرانی عێراق لە فراکسیۆنی یەکێتی بە ئاڤا نیوزی گوت: "لە کۆبوونەوەمان لەگەڵ نوێنەری جووتیارانی عەرەب، پێشنیازی ئەوە کراوە تاوەکو ئەو کاتەی یاسا کێشەکە چارەسەر دەکات، هیچ لایەکیان زەوییەکانی ئەو ناوچەیە نەکێڵن".