ئەنجوومەنی نوێنەرانی عێراق بەدواداچوون بۆ کێشەی جووتیارانی کەرکووک دەکات

ئاڤا نیوز

 

ئەندامێکی لیژنەی بەرگری و ئاسایش ڕایدەگەیێنێت، بۆ چارەسەر و یەکلاییکردنەوەی کێشەکانی جووتیارە کوردەکانی سەرگەڕان، سەردانی ناوچەکە دەکەن.

 

وێنە گەورەکە: لە دوای ڕووداوەکانی 16ـی ئۆکتۆبەرەوە، بەشێوەیەکی چڕ تەعریب لە کەرکووک دەستی پێکرد، جارێکی دیکە عەرەبی هاوردە لە سەرگەڕان و گوندەکانی دیکە دەستیان بە داگیرکردنی زەوییە کشتوکاڵییەکانی کورد کرد.

 

لێدوانی فەرمییەکان: مەریوان قەرەنی، ئەندامی لیژنەی ئاسایش و بەرگری بە ئاڤا نیوزی ڕاگەیاند: "ئەمڕۆ شاندێک بە سەرۆکایەتیی شاخەوان عەبدوڵڵا و ئەندامانی لیژنەکانی بەرگری و ئاسایش و کشتوکاڵ، سەردانی مەیدانی سەرگەڕان و ئەو گوندانە دەکەن".

 

نەجوا کاکەیی، ئەندامی ئەنجوومەنی نوێنەران لە فراکسیۆنی پارتی بە ئاڤا نیوزی گوت: "ئەم لیژنەیەی پەرلەمانی عێراق بۆ ئەوە هاتوون کێشەی جووتیاران لە گوندی پەلکانە چارەسەر بکەین و بەدڵنیاییەوە هاتنەکەشیان ئەنجامی دەبێت".

 

هۆکارە زانراوەکان: دوای پرۆسەی ئازادی لە عێراق، عەرەبی هاوردە لە کەرکووک و ناوچە کوردستانییەکانی دەرەوەی ئیدارەی هەرێم قەرەبوو کرانەوە، هیچ مافێکیان بەسەر زەوی کشتوکاڵی جووتیارانی کورد لە کەرکووک نەما و جووتیارە کوردەکانیش تاپۆی خاوەنداریێتیی زەوییەکانیان هەیە.

 

ئەوەی پێویستە بیزانیت: سەرۆکوەزیران بارزانی لە سیمپۆزیومی نێودەوڵەتی کاریگەرییەکانی وشکەساڵی گۆڕانی ئاووهەوا ڕایگەیاند، لەگەڵ ‌حکومەتی عێراق لە گفتوگۆداین بۆ ئەوەی دەستدرێژی بۆ سەر جوتیارانی کورد نەهێڵین.