شەڕ لە نێوان پاکستان و بەلووچییەکان روودەدات و 15 کەس دەکوژرێن

ئاڤا دیجیتاڵ

جارێکی دیکە شەڕ و پێکدادان لەنیوان چەکدارانی بەلووچستان و سوپای پاکستان روویدا، بەهۆیەوە 15 کەس کوژران و ژمارەیەک لە کوژراوەکانیش هاووڵاتی مەدەنین.

وێنە گەورەکە: لە باشووری رۆژئاوای پاکستان چەکدارانی بەلووچستان هێرشیان کردووەتەوە سەر چەند شوێنێکی حکومی و شەڕێکی قورسی یەک کاتژمێری روویداوە، بەهۆیەوە 15 کەس کوژراون، لەوانە: چوار سەربازی پاکستانی و دوو هاووڵاتی سڤیل.

لێدوانی فەرمی: بەرپرسانی هەرێمی بەلووچستان بە ئاژانسی فرانس پرێسیان راگەیاندووە، لە پێکدادانەکەدا بەلایەنی کەمەوە شەش چەکدار کوژراون، بەڵام دواتر سوپا رایگەیاند: نۆ چەکداری بەلووچ کوژراون، لەوانە سیانیان بۆمبیان لە خۆیان بەستبوو.

زانیاری زیاتر: شەڕەکە دوینێ سێشەممە 30-1-2024 روویداوە و سوپای ئازادی بەلووچستان، کە گرووپێکی جوداخوازن، بەرپرسیارێتیی خۆیان لە هێرشەکە راگەیاند. بەشی راگەیاندنی گرووپەکەش تەنها کوژرانی چوار سەربازی پاکستان و دوو هاووڵاتی مەدەنی پشتڕاستکردووەتەوە.

لەلایەکی دیکەوە: جان ئەچکەزئی، گوتەبێژی حکومی هەرێمی بەلووچستان رایگەیاندووە: " هێرشی رێکخراو کراوەتە سەر سێ دامودەزگای دەوڵەت، لەوانە بارەگای پەرلەمان و بنکەی پۆلیس".

ئەوەی پێویستە بیزانیت: ئیسلامئاباد چەندین دەیەیە لەگەڵ جوداییخوازەکانی بەلووچستاندا لەشەڕدایە. بەلووچستان گەورەترین و هەژارترین ناوچەی پاکستانە، بەڵام بە سەرچاوەی سرووشتی دەوڵەمەندە.

خەڵکانی ناوچەکە دەڵێن بەشی رەوای خۆیان لە نەوت و گاز پێنادرێت، هەرێمەکەش هەمیشە لە  خوارەوەی لیستی پێودانگی پەرەپێدانی مرۆیی پاکستان دایە.


باکگراوند: ئەم مانگە گرژییەکانی نێوان بەلووچییەکان و پاکستان زیاتر بوو، دوای ئەوەی ئێران لەناکاو هێرشی کردە سەر ئەو بەلووچییانەی پەنایان بردبووە بەر پاکستان، پاکستانیش وەڵامی هێرشەکەی ئێرانی بەوە دایەوە، کە خۆیشی هێرشی کردە سەر سوپای ئازادیی بەلووچستان، کە پەنایان بردبووە بەر ئێران.