پڕۆژەی گەشانەوە بۆ پێدانی قەرز دەست پێ دەكات

ئاڤا نیوز

وەزیری کار و کاروباری کومەڵایەتیی حكومەتی هەرێمی كوردستان ڕایگەیاند، پڕۆژەی گەشانەوە دەستی پێ کردووە و تاوەکو ئێستا دوو کەس لە پڕۆژەکەدا پارەی وەرگرتووە.

وێنە گەورەکە: ڕۆژی 25-9-2023، سەرۆکوەزیران بارزانی، پڕۆژەی گەشانەوە بۆ گەشەپێدانی بزنسی بچووک و مامناوەند ڕاگەیاند و گوتی: پڕۆژەکە قەرز بۆ بزنسە بچووک و مامناوەندەکان دابین دەکات، ئامانجیان پاڵپشتیکردنی کۆمپانیاکان، گەشەکردنی ئابووری و پەرەپێدانی ژینگەی بازرگانییە لە کوردستان.

لێدوانی فەرمی: کوێستان محەممەد، وەزیری کار و کاروباری کومەڵایەتیی حکومەتی هەرێمی کوردستان بە ئاڤا نیوزی گوت: پڕۆژەی گەشانەوە دەستی بە کارەکانی کردووە و تاوەکو ئێستا دووکەس پارەیان وەرگرتووە، کە هەریەکەیان 150 ملیۆن دیناریان وەرگرتووە.

زانیاریی زیاتر: هاووڵاتییان لە ڕێگەی ماڵپەری گەشانەوەوە فۆڕم پێشکەش دەکەن و دواتر هەڵسەنگاندیان بۆ دەکرێت و بە چەند فیلتەرێکدا تێدەپەڕن تا قەرزەکەیان پێ دەدرێت.

ئەوەی پێویستە بیزانیت: حکومەتی هەرێمی کوردستان لە ڕێگەی پڕۆژەی گەشانەوە، تاوەکو بڕی 150 ملیۆن دیناری عێراقی قەرز بۆ بزنسی بچووک و مامناوەندی دابین دەکات، بە ڕسوماتی کارگێڕیی %2 و بەبێ داواکردنی هیچ بارمتەیەک (ڕەهن) لەسەر قەرزەکان.