مالیکی هەوڵی دواخستنی کۆبوونەوەکەی پەرلەمان دەدات

ئاڤا نیوز 

 

سەرۆکی هاوپەیمانیی دەوڵەتی یاسا، داوای لە فراکسیۆنەکەی کردووە کار بۆ دواخستنی دانیشتنی پەرلەمانی عێراق بکەن.

 

وێنە گەورەکە: لە گەڕی دووەمی هەڵبژاردنی سەرۆکی پەرلەمانی عێراق  311 پەرلەمانتار دەنگیاندا، سالم عیساوی 158 دەنگ و مەحموود مەشهەدانی 137 دەنگی بەدەستهێنا. بەهۆی ئەوەی مەترسی کەوتە سەر دەرنەچوونی مەشهەدانی، کە لەلایەن مالیکی پشتگیری دەکرا، ئێستا هەوڵ بۆ ئەوەدەدات دانیشتنەکە دوابخات.

 

ئەوەی ئێستا ڕوودەدات: سەرچاوەیەک لە پەرلەمانی عێراق بە ئاڤا نیوزی ڕاگەیاند، نووری مالیکی داوای لە فراکسیۆنی دەوڵەتی یاسا کردووە کار لەسەر ئەوە بکەن دانیشتنی پەرلەمان دوابخەن و ژمارەیەکی زۆر لە پەرلەمانتاران باڵەخانەی پەرلەمانیان جێهێشتووە.

 

زانیاریی بەدەستهاتوو: موحسین مەندەلاوی لەگەڵ سەرۆکی فراکسیۆنەکان  گفتوگۆ دەکات، بۆ ئەوەی بڕیار بدرێت ئایا کۆبوونەوەکە بکرێت و سەرۆکی پەرلەمان هەڵبژێردرێت یان دانیشتنەکە دوابخرێت.

 

ئەوەی پێویستە بیزانیت: بەپێی پەیڕەوی نێوخۆی پەرلەمان، ئەگەر هاتوو لە گەڕی یەکەم و دووەمدا پۆستی سەرۆکی پەرلەمان یەکلانەکرایەوە، سەرلەنوێ دەرگای خۆکاندیدکردن بۆ پۆستی سەرۆکی پەرلەمان دەکرێتەوە.