وەزارەتی دارایی عێراق ڕەزامەندی لەسەر زیادکردنی مووچەی خانەنشینان دەدات

ئاڤا نیوز

 

وەزارەتی دارایی عێراق ڕەزامەندی لەسەر زیادکردنی مووچەی خانەنیشانی هەرێمی کوردستان و هاوتاکردنی لەگەڵ عێراق دەربڕیوە و بڕیارە لە ماوەی 10 ڕۆژی داهاتوودا لیستی ناوەکانیان ڕەوانەی بەغدا بکرێت. 

 

بۆچی گرنگە: بڕیاری زیادبوونی مووچە زیاتر لە 150هەزار خانەنشین دەگرێتەوە، کە کاریگەریی ڕاستەوخۆی لەسەر باشترکردنی گوزەرانی ژیانیان دەبێت. 

 

وێنە گەورەکە: لە هەرێمی كوردستان یاسایەكی خانەنشینی  یەکگرتوو نییە، دوو ساڵ پێش ئێستا دادگەی باڵای فیدراڵیی عێراق بڕیاری دا کار بە یاسای خانەنشینی عێراق بکرێت. 

 

زانیاریی تایبەت: ئاڤا زانیویەتی، لە ماوەی 10 ڕۆژی داهاتوو، تاوەکو سەرەتای مانگی 6ـی ئەمساڵ لیستی خانەنشینان ئامادە دەکرێت و ڕەوانەی بەغدا دەکرێت. 

 

لەلایەکی دیکەوە: وەزارەتی دارایی هەرێمی کوردستان ئاگاداری وەزارەتی دارایی عێراق کردووەتەوە و ئەوانیش هیچ لارییەكیان نەبووە، چونکە بڕیارەکە لە لایەن دادگەی فیدراڵی دەرکراوە. 

 

ژمارەکان وا دەڵێن: کۆی گشتیی خانەنشینانی مەدەنی و سەربازی بە وارسی خانەنشینانەوە 274هەزارە:

• ـ نزیکەی 80 هەزار کەسیان، مووچەیان 220 هەزار دینارە و دەبێتە 500 هەزار.

- ئەوانەی مووچەیان لە نێوان 500هەزار بۆ ملیۆنێکە، نزیکەی 100هەزار دیناریان زیاد دەبێت.

- ئەوانەی مووچەیان لە ملیۆنێک زیاترە، مووچەیان نزیکەی 50 هەزار دینار زیاد دەبێت.