لە سعوودیە تابلۆی ڕێنمایی بە زمانی كوردی دادەنرێت

ئاڤا نیوز

به‌ مه‌به‌ستی پێشوازیكردن له‌ حاجیانی هه‌رێمی كوردستان، له‌ ده‌روازه‌ی سنووری عه‌رعەر لە سعوودیه،‌ تابلۆی ڕێنمایی به‌ زمانی كوردی زیاد ده‌كرێت.

وێنە گەورەکە: دوای به‌شداریكردنی به‌رێوه‌به‌ری گشتی حه‌ج و عومره‌ی هه‌رێمی كوردستان له‌ كۆنفرانسی جەدده‌ بۆ خزمه‌تگوزاری حه‌ج و عومره‌ له‌ میانه‌ی كۆنفرانسه‌كه‌دا پێشنیازی زیادكردنی زمانی كوردی له‌ شوێنه‌ فه‌رمییه‌كان بۆ وه‌زیری حه‌ج و ده‌سه‌ڵاتدارانی سعوودیه‌ كرد.

لێدوانی فەرمی: كاروان ستوونی، گوتەبێژی بەڕێوەبەرایەتیی گشتیی حەج و عومرە لە هەرێمی كوردستان بە ئاڤا نیوزی گوت: لەم هەفتەیدا وه‌زاره‌تی حه‌ج و عومڕه‌ی سعوودیه‌  داوای كردووه‌ به‌ زووترین كات تابلۆكانی ده‌روازه‌ی سنووری عه‌رعەر به‌ زمانی كوردی ڕه‌وانه‌ بكرێت و بۆ پێشوازیكردنی حاجیان دابنرێت.

بۆچی گرنگە: ئەمە یه‌كه‌م جاره‌ له‌ مێژووی سعوودیە زمانی كوردی له‌ شوێنه‌ فه‌رمییه‌كان دابنرێت، ئەمەش ئاسانكاری بۆ حاجییان و عومرەكارانی كورد دەكات.