عێراق بیر لە هەناردەکردنی گەنم دەکاتەوە

ئاڤا نیوز  

وەزارەتی بازرگانی عێراق ڕایدەگەیێنێت، لە بەروبوومی گەنم گەیشتوون بە ئاستی خۆبژێوی و بیر لە بژاردەی هەناردەکردنی گەنم دەکەنەوە.

وێنە گەورەکە: جیاواز لە ساڵانی ڕابردوو، ئەمساڵ عێراق پلانی وەرگرتنی بڕێکی زیاتری بەرهەمی گەنمی جووتیارانی داناوەو و پێشوەختەش پارەی بۆ کڕینەوەی گەنمی جووتیاران تەرخان کردووە، واتە لەگەڵ ڕادەستکردنی گەنمەکانیان پارەکانیان بۆ خەرج دەکرێت.

لێدوانی فەرمی: حەیدەر گەرعاوی، بەڕێوەبەری کۆمپانیای گشتیی بازرگانی دانەوێڵە ڕایگەیاند: وەزارەت سەرقاڵی تاوتوێکردنی پرۆسەی هەناردەکردنی بەرهەمی گەنم دەکات، بەتایبەتی کە بڕی گەنم بۆ ئەمساڵ دەگاتە حەوت ملیۆن و 800 هەزار تۆن، لە کاتێکدا پێویستی ڕاستەقینەی عێراق لەگەڵ ئەو گەنمەی هەڵگیراوە شەش ملیۆن تۆنە".

زانیاریی زیاتر: زیادبوونەکە لەلایەن وەزارەتەوە گفتوگۆی لەسەر دەکرێت، بەوەی یان هەناردە بکرێت یان هەماهەنگی لەگەڵ ئاشە تایبەتەکان بکرێت بۆ بەرهەمهێنانی ئاردی سفر".

ئەمەش بزانە: بڕیارە ئەمساڵ نزیکەی یەک ملیۆن تۆن گەنمی جووتیارانی هەرێمی کوردستان وەربگیرێت، لەماوەی 10 ساڵی ڕابردوودا یەکەمجارە عێراق ئەو بڕە گەنمە لە جووتیارانی هەرێمی کوردستان وەردەگرێت.