پارتی لە یادی شۆڕشی گوڵان: سەرەڕای هەموو دژایەتییەكان هێشتا یەكەمی كوردستان و عێراقین

ئاڤا نیوز

 

پارتی دیموكراتی كوردستان لە یادی 48 ساڵەی  شۆڕشی گوڵاندا ڕاگەیێنراوێکی بڵاوكردەوە و دەڵێت، سەرەڕای هەموو دژایەتییەكان پارتی هەر یەكەمی كوردستان و عێراقە، دەشڵێت، "پشتیوانی لە هەڵبژاردنێکی گەل پەسەند دەکەین."

 

وێنە گەورەكە: دوای ئەوەی ڕژێمی بەعس پابەند نەبوو بەڕێككەوتنەكانی یانزەی ئازارەوە، كە پەیوەستبوون بە مافەكانی گەلی كورد، پارتی دیموكراتی كوردستان بە پشتیوانی خەڵكی كوردستان شۆڕشی گوڵانی دژی ڕژێمی بەعس دەستپێکرد و لە بیست و شەشی گوڵانی ساڵی 1976 و لە چیاکانی کوردستانەوە دووبارە ھەڵگیرسانەوەی شۆڕشی ڕاگەیاند.

 

ڕاگەیێنراوی فەرمی: پارتی دیموکراتی کوردستان ڕایگەیاند، دووپاتی پشتیوانییان لە دامەزراوە سەروەرییەکانی سەرۆکایەتی ھەرێم و حکومەتێکی بەھێز و سەرتاسەری دەکەنەوە، کە لە ئاست ئەرکەکانی قۆناغەکەدا بن و بتوانن سەقامگیریی کوردستان وەک ھەمیشە بپارێزن و ژیان و گوزەرانی خەڵک بەرەو باشتر و باشتر ببەن.

لەلایەکی دیکەوە: لە راگەیێنراوەکەدا پارتی دەڵێت: سەرەڕای ئەو ھەموو پیلان و گەلەکۆمەکییەی لێمانکراوە، پارتی وەک پێشڕەوی کوردایەتی و کۆڵنەدان، وەک ھەمیشە شۆڕەسواری مەیدانە و بە پاڵپشتیی گەل، حیزبی ژمارە یەکی عێراق و کوردستانە.

 

زانیاری زیاتر: لەبارەی هەڵبژاردنەوە پارتی دەڵێت، پشتیوانی کاراکردنەوەی پەرلەمانی کوردستان بە "ھەڵبژاردنێکی گەل پەسەند دەکەین کە پێویستی بە یەکڕیزی و یەکھەڵوێستیی نەتەوەیی و نیشتمانی ھەیە، ئەو یەکڕیزییەی، کە پارتیمان زۆرترین نەرمیی لە پێناودا نواند."