سەرۆکوەزیران بارزانی: بانگهێشتی وەبەرهێنەرانی قەتەر دەکەین بۆ هەرێمی کوردستان

ئاڤا نیوز

 

سەرۆکوەزیران بارزانی لە ڕێوڕەسمی کردنەوەی کۆنسوڵخانەی قەتەر لە هەولێر ڕایگەیاند، دەکرێت سوود لە ئەزموونی دەوڵەتی قەتەر وەربگرین و هەرێمی کوردستانیش ژینگەیەکی لەباری بۆ وەبەرهێنان هەیە.

 

بۆچی گرنگە؟ سەرۆکوەزیران بارزانی لە کردنەوەی کونسۆڵگەریی قەتەر لە هەولێر ڕێزو پێزانینی بۆ میری قەتەر دەربڕی و هیوای خواست لەسەر بنەمای بەرژەوەندیی هاوبەش پەیوەندییەکانی هەولێر و دەوحە زیاتر پەرە بستێنن و "کردنەوەی کۆنسوڵخانەی گشتیی قەتەر هاوکار و یارمەتیدەر لە بەرەوپێشبردنی پەیوەندییەکانی نێوان لە بوارە جۆراوجۆرەکاندا، بە تایبەتی لە بوارەکانی بازرگانی و کشتوکاڵی و کلتووری و خوێندنی باڵادا".

کاریگەری و لێکەوتەکان: سەرۆکوەزیران بارزانی لە وتارەکەیدا باسی قەتەری لە ڕووی وەبەرهێنان و ئاوەدانی و بیناسازیی و وزەو جموجۆڵ و چالاکیی ئابوورییەوە کرد کە و بە دەوڵەتێکی دەوڵەمەند و خاوەن ئەزموونی سەرکەوتوو زانی، "بۆیە دەکرێت هەرێمی کوردستان سوود لە ئەزموونی دەوڵەمەندی قەتەر لەم بوارانەدا وەربگرێت".

بابەتە ستراتیژییەکان: سەرۆکوەزیرانی هەرێی کوردستان، بانگهێشتی وەبەرهێنەرانی دەوڵەتی قەتەری کرد تا سەردانی هەرێمی کوردستان بکەن ترا لە ڕێگەی پرۆژە جۆراوجۆرەکانەوە وەبەرهێنان بکەن و ئامادەیی حکومەتی هەرێمی کوردستانیشی نیشان دا بۆ پێشکەشکردنی هەر کارئاسانییەک.

 

باکگراوند: ئەمڕۆ مەسرور بارزانی سەرۆکی حکومەتی ھەرێمی کوردستان بە یاوەری دکتۆر ئەحمەد ئەلحەمادی ئەمینداری گشتی وەزارەتی دەرەوەی قەتەر لە بۆنەیەکی فەرمیدا کونسوڵخانەی گشتیی وڵاتی قەتەر لە ھەولێری پایتەختی ھەرێمی کوردستانیان کردەوە.