ئیسرائیل پێشنیازی نوێی بۆ ئاگربەستی غەززە هەیە

ئاڤا نیوز

 

ئیسرائیل پێشنیازی نوێی بۆ ئاگربەست هەیە و بۆ گفتوگۆکردن لەگەڵ حەماس نەرمی دەنوێنێت.

 

وێنە گەورەکە: میدیاکانی ئیسرائیل باس لەوە دەکەن، تەلئەڤیڤ پێشنیازێکی نوێی بۆ ئاڵوگۆڕکردنی بارمتەکان بە نامە بۆ قەتەر، میسر و ئەمریکا ناردووە.

 

زانیارییە بەدەستهاتووەکان: ماڵپەڕی "وەڵا" بڵاویکردەوە، پێشنیازەکەی ئیسرائیل بریتییە لە "نەرمی نواندن" سەبارەت بە ژمارەی بارمتە زیندووەکان کە لە قۆناغی یەکەمدا ئازاد دەکرێن، ئەمە جگە لەوەی ئامادەیە بۆ گفتوگۆکردن لەسەر داوای حەماس بۆ "ئاگربەستی هەمیشەیی" لە کەرتی غەززە.

 

بۆچی گرنگە: ئەم داوایە لە هەموو گەڕەکانی پێشووی دانوستانەکاندا بەربەست بوو، چونکە ئیسرائیل بەردەوام پێداگری دەستپێکردنەوەی شەڕ دەکات تاوەکو ئەو کاتەی حەماس لەناو دەچێت.

 

ئەمەش بزانە: پێشنیازەکە دەیڤید بارنیا، سەرۆکی دەزگای هەواڵگریی ئیسرائیل "مۆساد" پێشکەشی محەمەد بن عەبدولڕەحمان ئالسانی، سەرۆکوەزیرانی قەتەر کرد، لە میانی کۆبوونەوەیەکدا کە لە ڕۆژی هەینی لە پاریس بەڕێوەچوو.