ئەمریکا پێگەی میلیشیاکانی ئێران لە عێراق و سووریا بۆردوومان دەکات

ئاڤا دیجیتاڵ

 

ئەمریکا چەند پێگەیەکی گرووپە چەکدارەکانی نزیک لە ئێرانی لە پارێزگای دێرەزوور لە سووریا و پارێزگای ئەنبار لە عێراق بۆردوومان کرد.

 

وێنە گەورەکە: لەگەڵ دەستپێکردنی شەڕی نێوان ئیسرائیل و حەماس، لە عێراق و سووریا زیاتر لە  160 جار هێرشکراوەتە سەر بنکەکانی ئەمریکا، هەروەها 28ـی مانگی ڕابردووش هێرشکرایە سەر بنکەی تاوەر 22ـی ئوردن و بووە هۆی کوژرانی سێ سەرباز و برینداربوونی دەیان سەربازی دیکە، ئەوکاتە ئەمریکا "هەڕەشەی تۆڵەسەندنەوە"ـی ئەو هێرشانەی کرد.

 

ئەوەی پێویستە بیزانیت: درەنگانی شەوی هەینی 02-02-2024 ئەمریکا چەند پێگەیەکی میلیشیاکانی ئێرانی لە ناوچەکانی حەیدەرییە و شبلی لە دێرزوور و ناوچەکانی نێوان ئەلبوکەمال و مەیادین لە ڕۆژهەڵاتی سووریا و ناوچەی قائیم لە پارێزگای ئەنبار بۆردوومان کرد.

 

لێدوانی فەرمی: بەرپرسێکی ئەمریکی بۆ کەناڵی ABC ڕایگەیاند: هێرشی تۆڵەی سێ سەربازەکەی ئەمریکا لە ئوردن دەستیپێکرد. 

 

لەلایەکی دیکەوە: بەرپرسێکی وەزارەتی بەرگریی ئەمریکا بۆ Fox News دەڵێت: ئەم هێرشانە تەنیا سەرەتای تۆڵەکردنەوەی ئەمریکایە.

 

زانیاریی زیاتر: میدیاکانی ئێران ئاماژە بەوە دەکەن لە هێرشەکەی ئەمشەوی سەر دێرەزوور 10 کوژراو هەیە.

 

ئەوەی ئێستا ڕوودەدات: بەپێی سەرچاوە سەربازییەکان دەیان فڕۆکە و درۆن تاوەکو ئێستا بەسەر ئاسمانی عێراق و سووریا دەسووڕێنەوە و هێرشەکانی ئەمریکا بۆ سەر بنکەکانی میلیشیاکانی ئێران لە سووریا تاوەکو ئامادەکردنی ئەم هەواڵە [کاتژمێر 12:02 خولەک] بەردەوامە.

 

باکگراوند: ڕۆژی 28ـی مانگی ڕابردوو گرووپی مقاوەمەی ئیسلامی هێرشی کردە سەر بنکەی تاوەر 22ـی ئوردن و بووە هۆی کوژرانی سێ سەرباز و برینداربوونی دەیان سەربازی دیکە، جۆ بایدن سەرۆکی ئەمریکا دوای دوو ڕۆژ لەبارەی ئەو هێرشانە ڕایگەیاند: لەگەڵ تیمی ئاسایشی نیشتمانیی وڵاتەکەی بڕیاریانداوە چۆن وەڵامی ئەو هێرشە بدەنەوە کە کرایە سەر بنکەی تاوەر 22ـی ئوردن.