بەندەرە کاتییەکەی غەززە لادەبرێت

ئاڤا نیوز

 

پێنتاگۆن ڕایدەگەیێنێت، ئەو بەندەرە کاتییەی کە لە کەناراوەکانی غەززە دروستکرابوو، دوای داڕمانی بەشێکی، لادەبرێت.

 

کاریگەری و لێکەوتەکانی: ئەو بەندەرە کاتییە لەلایەن ئەمریکاوە بۆ گەیاندنی یارمەتییە مرۆییەکان بە خەڵکی غەززە دروست کرابوو، ئەمەش ڕێگر دەبێت لەبەردەم گەیاندنی هاوکارییەکان بۆ غەززە. 

 

ڕاگەیێنراوی فەرمی: سابرینا سینگ، گوتەبێژی پێنتاگۆن ڕایگەیاند، بەشێکی بەندەرەکە لێک جیابووەتەوە، لە ماوەی 48 کاتژمێری داهاتوودا ئەو بەشەی بەندەرە کاتییەکە کە زیانی بەرکەوتووە، ڕادەکێشرێت بۆ بەندەری ئەشدۆد لە ئیسرائیل و نۆژەن دەکرێتەوە. 

 

زانیاریی بەدەستهاتوو: چاککردنەوەی بەندەرەکە زیاتر لە هەفتەیەک دەخایێنێت و دواتر دەیگەڕێننەوە شوێنی خۆی.

 

هۆکارە زانراوەکان: بەپێی هەواڵێکی ڕۆیتەرز، بەهۆی خراپی دۆخی کەشوهەوا بەشێکی بەندەرەکە تێکشکاوە.

 

لەلایەکی دیکەوە: گوتەبێژی بەرنامەی جیهانیی خۆراکی نەتەوە یەکگرتووەکان ڕایگەیاند، لەو کاتەوەی لەو بەندەرە دەست بە کارەکان کراوە، نەتەوە یەکگرتووەکان 137 بارهەڵگری یارمەتی لە بەندەرەکەوە گواستووەتەوە کە 900 تۆن خۆراکی لەخۆگرتبوو.