تۆمارکردنی ناوی بەربژێرانی سەرۆککۆماری ئێران دەستیپێکرد

ئاڤا نیوز

 

لە کاتژمێر هەشتی بەیانیی ئەمڕۆوە پرۆسەی تۆمارکردنی ناوی بەربژێران بۆ هەڵبژاردنی پێشوەختەی سەرۆکایەتیی کۆماری ئێران دەستیپێکرد.

 

لێدوانی فەرمی: ئەحمەد وەحیدی، وەزیری ناوخۆی ئێران ڕایگەیاند:  لە بەیانیی ئەمڕۆوە پرۆسەی تۆمارکردنی ناوی بەربژێران بۆ هەڵبژاردنی خولی 14یەمینی سەرۆکایەتیی دەستیپێکرد و بۆ ماوەی پێنج ڕۆژ بەردەوام دەبێت.

 

زانیاریی بەدەستهاتوو: دوای کۆتاییهاتنی تۆمارکردنی ناوی بەربژێرەکان، ئەنجوومەنی چاودێریی پێداچوونەوە بە شیاوبوونی بەربژێرەکان لە ماوەی حەوت ڕۆژدا دەکات و لە 11ـی حوزەیران ناوی بەربژێرەکان لەلایەن وەزارەتی ناوخۆوە ئاشکرا دەکرێت و بڵاودەکرێتەوە.

 

ئەوەی پێویستە بیزانیت: لەماوەی 12ـی حوزەیران تاوەکو 26ـی حوزەیران بانگەشەی هەڵبژاردن بۆ بەربژێرەکان دەستپێدەکات و ڕۆژی 27ـی مانگ کۆتایی بە بانگەشەی هەڵبژاردن دەهێنرێت و هەڵبژاردن لە 28ـی حوزەیران بەڕێوەدەچێت.

 

باکگراوند: دوای گیانلەدەستدانی سەرۆککۆماری ئێران و هاوەڵاکانی لە 19ی ئایار، بەگوێرەی دەستووری ئێران،  لە ئەگەری مردن، نەبوونی یان نەخۆشکەوتنی سەرۆککۆمار، جێگری یەکەم ئەرکەکانی سەرۆککۆمار لە ئەستۆ دەگرێت و دەبێت لە ماوەی 50 ڕۆژدا هەڵبژاردن بۆ سەرۆککۆمار بکرێت.