حووسییەکان ژمارەیەک درۆن و مووشەکی بالیستیک ئاراستەی کەشتییەکان دەکەن

ئاڤا نیوز

 

حوسییەکانی یەمەن لە تۆڵەی هێرشەکەی ئەمریکا و بەریتانیا کە بووە هۆی کوژرانی 16 کەس، پێنج درۆن و دوو مووشەکی بالیستی ئاراستەی کەشتییە بازرگانییەکانی دەریای سوور دەکەن.

 

ڕاگەیێنراوی فەرمی: فەرماندەی ناوەندیی هێزەکانی ئەمریکا، سێنتکۆم، ڕایگەیاند پێنج درۆنی حووسییەکانیان لە ئاسمانی دەریای سوور و کەنداوی عەدەن تێک شکاندووە. هەروەها حووسییەکان دوو مووشەکی بالیستیکی دژە کەشتییان ئاراستە کردوون.

 

زانیاریی زیاتر: هێرشی تۆڵە سەندنەوەی حووسییەکان هیچ زیانێکی گیانی و ماددی بەدوای خۆیدا نەهێناوە.

 

ئەوەی پێویستە بیزانیت: حووسییەکان کۆنترۆڵی زۆربەی خاکی یەمەن و پایتەختی ئەو وڵاتەیان بە دەستەوەیە، لەلایەن ئێرانەوە پاڵپشتی دەکرێن و لە نۆڤەمبەرەوە بە پاساوی بەرگریکردن لە فەلەستین و دژایەتیکردنی هێرشی ئیسرائیل بۆ سەر ‌غەززە هێرش دەکەنە سەر کەشتییە بازرگانییەکانی دەریای سوور کە 12%ـی بازرگانیی جیهانیی تیادا ئەنجام دەدرێت.