لە تورکیا حەوت کەس بە تۆمەتی سیخوڕی بۆ ئیسرائیل دەستگیر دەکرێن

ئاڤا دیجیتاڵ

پۆلیسی تورکیا حەوت کەسی بە تۆمەتی فرۆشتنی زانیاری بە دەزگای مۆسادی ئیسرائیلی دەستگیر کرد، ئەردۆغانیش ڕێگە بە ئیسرائیل نادات بەرپرسەکانی حەماس لەسەر خاکی تورکیا بەئامانج بگرێت.

 

ئەوەی پێویستە بیزانیت: ئاژانسی ئەنادۆڵو ڕایگەیاند، بە فەرمانی نووسینگەی داواکاریی گشتیی ئیستەنبووڵ، پۆلیس و لقی هەواڵگری لە ئیستەنبووڵ و بەری ڕۆژئاوای شاری ئیزمیر لە ئۆپەراسیۆنێکی هاوبەشدا لەگەڵ دەزگای هەواڵگریی تورکیا (میت) حەوت کەسیان دەستگیر کرد کە گوایە لە ڕێگەی لێکۆڵەری تایبەتەوە زانیارییان بۆ مۆساد ناردووە.

 

وێنە گەورەکە: بەرپرسانی باڵای حکومەتی تورکیا ئاژانسی هەواڵگری مۆساد بەوە تۆمەتبار دەکەن وەک بەشێک لە ئۆپەراسیۆنەکانی خۆی، خەڵکی فەڵەستینی و سووریی لە دژی بیانییەکانی نێو تورکیا دادەمەزرێنێت.

 

لەلایەکی دیکەوە: ئەردۆغان، سەرۆککۆماری تورکیا، ئیسرائیلی ئاگادار کردەوە کە ئەگەر سوور بێت لەسەر هێرشکردنە سەر بەرپرسانی بزووتنەوەی حەماس لەسەر خاکی تورکیا، ئەوا "لێکەوتەی جددی"ی دەبێت.

 

لێدوانی فەرمی: یڵماز تونج، وەزیری دادی تورکیا، ڕایگەیاند: "زۆربەی گومانلێکراوەکان بە تۆمەتی سیخوڕیی سیاسی یان سەربازی بۆ ئیسرائیل تۆمەتبار کراون".

 

بۆچوونی لایەنی بەرامبەر: سەرۆکی شین بێت (ئاژانسی ئاسایشی ناوخۆی ئیسرائیل) لە کانوونی یەکەمدا ڕایگەیاند کە ڕێکخراوەکەیان ئامادەن لەهەر کوێیەک بێت حەماس بەئامانج بگرن، بە لوبنان و تورکیا و قەتەڕیشەوە.

 

باکگراوند: مانگی ڕابردوو پۆلیسی تورکیا 34 کەسی بە تۆمەتی سیخوڕی بۆ ئیسرائیل دەستگیر کرد. بە پیلاندانان و ئەنجامدانی چالاکی و گەڕان و بەدواداچوون و دەستدرێژی و ڕفاندنی هاووڵاتیانی بیانیی نێو تورکیا تۆمەتباری کردن.