وەزارەتی ڕۆشنبیری و لاوان سوپاسی ئاڤا دەکات بۆ کۆکردنەوەی گەنجانی کوردستان لە ئیسکان

ئاڤا نیوز 

 

وەزارەتی ڕۆشنبیریی هەرێمی کوردستان سوپاسی ئاڤا دەکات بۆ ئەو کەرنەڤاڵە وەرزشییەی لە ئیسکان ڕێکی خستووە و دەڵێت "وەک چۆن گرنگیدان بە گەنجان لە کارنامەی کابینەی نۆیەم هاتووە، ئەرکی هەموو لایەکە گرنگیان پێبدات، ئەو کارەی ئاڤاش جێگەی ڕێزە".

 

وێنە گەورەکە: کاتژمێر 10:00ـی شەوی شەممە 01-06-2024 یاریی کۆتایی چامپیۆنزلیگ لەنێوان هەردوو یانەی ڕیال مەدرید و بڕووسیا دۆرتمۆند بەڕێوە دەچێت، بۆ ئەم مەبەستە ئاڤا کەرنەڤاڵێکی وەرزشی لە شەقامی ئیسکانی شاری هەولێر ڕێکخستووە و سێ شاشەی گەورەی لە شەقامەکە داناوە، گەنجان لە سەرجەم شار و شارۆچکەکانی هەرێمی کوردستانەوە بۆ هەولێر دەهێنێت بەمەبەستی سەیرکردنی یارییەکە. 

لێدوانی فەرمی: نامیق هەورامی، گوتەبێژی وەزارەتی ڕۆشنبیریی و لاوانی هەرێمی کوردستان کارەکانی ئاڤا و ئەو هەنگاوەی بەرز دەنرخێنێت و دەڵێت: سوپاسی ئاڤا دەکەم لەو هەنگاونانەی وەک کەناڵێک کە گرنگی بە خێزان دەدات، جێگەی ڕێز و دەستخۆشییە و ئەرکی هەموو لایەنێکە گرنگی تایبەت بە لاوان بدات، وەک چۆن لە کارنامەی کابینەی نۆیەمدا ئاماژەی بە گرنگی گەنجان کراوە.

 

زانیاریی زیاتر: نامیق هەورامی جەخت دەکاتەوە کە شێواز و ستایلی ئاڤا لە کاری میدیاییدا نوێیە و گرنگی بەو توێژانە دەدات کە ئایندەی وڵاتن.