زیاد ئەسعەد بۆ ئاڤا میدیا: تەندروستیم زۆر باشە

ئاڤا دیجیتاڵ

 

زیاد ئەسعەد، هونەرمەندی دیاری کوردستان تەندروستیی باشە و ئەو دەنگۆیانە رەتدەکاتەوە کە لەبارەی تەندروستییەوە دەگوترێن.

 

لە زاری خۆیەوە: لە لێدوانێکی تایبەتدا بۆ ئاڤا نیوز هونەرمەند زیاد ئەسعەد دەڵێت: "تەندروستیم زۆر باشە و هەموو رۆژێک لە دوێنێ باشترم". ئەو ئێستا رۆژانە سەرقاڵی کاری هونەری و وەرزشکردنە. پرۆژەیەکی هونەری و میدیاییش یەکێکە لە پلانە نزیکەکانی، بەڵام زانیاریی زیاتری لەبارەیەوە نەدا و دەڵێت: "منیش تامەزرۆی شادبوونەوە بە هەوادارەکانمم و پێیان دەڵێم من باشم و سڵاوم بۆ هەمووتان هەیە".

 

بۆچی گرنگە: لە دوو رۆژی ڕابردوودا هەواڵی نەخۆشکەوتن و گیانلەدەستدانی زیاد ئەسعەد بڵاوبووەوە، بەڵام هەواڵەکە ناڕاستە و ئاڤانیوز وەک یەکەم میدیا قسەی لەگەڵ هونەرمەد زیاد ئەسعەد کردووە و تەندروستیی جێگیرە.

 

پرۆفایل:

-    زیاد ئەسعەد، گۆرانیبێژ، ئاوازدانەر و هۆنراوەنووسی دیاری کوردستانە
-    ساڵی 1966 لە گەڕەکی تەیراوەی هەولێر لەدایک بووە
-    لە ساڵی 1983 بە گۆرانیی دوعادەکەم دەستی کردووە بە گۆرانی گوتن.
-    یەکەم کاسێتی لە ساڵی 1988 بڵاو کردووەتەوەو تاوەکو ئێستا خاوەنی پێنج ئەلبوومی گۆرانییە.
-    تاوەکو ئێستا 140 گۆرانی بەشێوەی ئاواز و تێکست داوەتە هونەرمەندانی کوردستان

 

زانیاریی زیاتر:  زیاد ئەسعەد لە ساڵی 1993 کوردستانی جێھێشتووە و لە وڵاتی سوید دەژی. بەھۆی دەرنەکەوتنی لە میدیاکانەوە، ماوەیەکی زۆرە مشتومڕ لەبارەی باری تەندروستی و دەروونیی دروست بووە.  ئاڤا میدیا جگە لە خۆی، لەگەڵ زۆربەی ھاوڕێ و کەسە نزیکەکانی قسەی کردووە و هەموویان جەخت دەکەنەوە کە ئەو ھیچ کێشەیەکی تەندروستی نییە.