وەزیری بازرگانی و پیشەسازیی هەرێمی کوردستان: سایلۆکان بۆ وەرگرتنی گەنم ئامادەن

ئاڤا نیوز

 

وەزیری بازرگانی و پیشەسازیی هەرێمی كوردستان ڕایدەگەیێنێت، بە ئەندازەی ئەو بڕە پارەیەی حکومەتی عێراق دەیخاتە سەر هەژماری وەزارەتەکەیان گەنم لە جوتیاران وەردەگرن.

 

بۆچی گرنگە: بەهۆی زۆری ڕێژەی بارانبارینەوە، بەرهەمی ئەمساڵی گەنمی جوتیاران زیاتر لە یەک ملیۆن تۆن دەبێت.

 

لێدوانی فەرمی: کەمال موسلیم، وەزیری بازرگانی و پیشەسازیی هەرێمی كوردستان، بە ئاڤا نیوزی گوت: ''سایلۆکان ئامادەن و توانای وەرگرتنی زیاتر لە یەک ملیۆن تۆن گەنمیان هەیە، بەڵام تا وەزارەتی کشتوکاڵ لەگەڵ بەغدا لەسەر بڕی گەنمی وەرگیراو ڕێک نەکەوێت، ناتوانین دەرگای سایلۆکان بکەینەوە، چونکە بە ئەندازەی ئەو بڕە گەنمەی دیاری دەکرێت پارە دێتە سەر هەژماری وەزارەتەکەمان."

 

ئەوەی پێویستە بیزانیت: وەزارەتی کشتوکاڵی هەرێمی کوردستان لەگەڵ وەزارەتی کشتوکاڵ و وەزارەتی بازرگانی عێراق، چەندین جار دانیشتن و گفتوگۆی کردووە، بۆ ئەوەی هەموو گەنمی ئەمساڵی جوتیاران هاوشێوەی شارەکانی عێراق وەربگیرێت، بەڵام تا ئێستا ڕێکنەکەوتوون.