لە ئیدارەی ڕاپەڕین گەنجێک بە دامەزراندنی کارگەیەکی ڕیسایکلین دەیان هەلی کار دەڕەخسێنێت

ئاڤا دیجیتاڵ

 

گەنجێکی خەڵکی چوارقوڕنە کارگەیەکی ڕیسایکلینی "نایلۆن، پلاستیک، کارتۆن و ئاسن"ـی داناوە و لە ناوچەکەدا دەیان هەلی کاری بۆ هاونیشتمانیان ڕەخساندووە، وەک خۆی دەڵێت، سەرەڕای دابینکردنی بژێویی چەندین کەس، ژینگەش لە پاشماوەکان پاک دەکەنەوە.

 
چیرۆکی سەرەکی: ماوەی حەوت ساڵ زیاترە گەنجێکی شارۆچکەی چوارقوڕنە "عەبدوڵڵا حەوێز" کارگەیەکی ڕیسایکلینی "نایلۆن، پلاستیک، کارتۆن و ئاسن"ـی بەناوی باوکییەوە لە ڕێگەی سەرەکیی نێوان چوارقوڕنە - حاجیاوا داناوە و 15 بۆ 20 کرێکار لەخۆدەگرێت.

 
بۆچی گرنگە: دانانی کارگەی ڕیسایکلین لە هەرێمی کوردستان گرنگییەکی زۆری هەیە، بەتایبەت لەڕووی پاککردنەوەی ژینگە لە پاشماوەکان و دووبارە بەکارهێنانەوەی شتومەکە بەکارهێنراوەکان. 
 

لێدوانی فەرمی: عەبدوڵڵا حەوێز، گەنجێکی کاسبکاری دەڤەری ڕاپەڕینە بۆ ئاڤا نیوز گوتی: توانیومانە کارگەیەکی ڕیسایکلینی "نایلۆن، پلاستیک، کارتۆن و ئاسن" دابمەزرێنین لەپێناو بژێویی ژیانی خۆم و دەیان کارمەندی دیکە، بەڵام لەپاڵ ئەوەشدا کار دەکەین بۆ خاوێنکردنەوەی ژینگەی دەوروبەرمان لەو پاشماوانە دەتوانرێن دووبارە بەکاربهێنرێنەوە.

 

زانیاریی زیاتر: ڕووبەری کارگەکە زیاتر لە 10 دۆنمە و سێ ئامێری گەورەی ڕیسایکلین بە بەردەوامی کاردەکەن و ڕۆژانە زیاتر لە سێ تۆن شتومەک ڕیسایکل دەکرێنەوە.

 
ئەوەی پێویستە بزانرێت: خاوێنکردنەوەی ژینگەی دەڤەری ڕاپەڕین لە سێ تۆن پاشماوە و دابینکردنی دەیان هەلیکار بۆ گەنجانی دەڤەرەکە "کارێکی گرنگە" هەبوونی ئەم جۆرە کارگانەش لە هەرێمی کوردستان کاریگەرییان دەبێت بۆ پاکڕاگرتنی ژینگە.