دانیشتنی دادگەی فیدراڵی لەبارەی هەڵبژاردنی هەرێمی کوردستان دواخرا

ئاڤا دیجیتاڵ

جارێکی دیکە دادگەی فیدراڵی عێراق بڕیاردانی لەبارەی یاسای هەڵبژاردنی پەرلەمانی کوردستان دواخست و داوای لیستی کۆتایی تۆماری دەنگدەرانی هەرێمی کوردستان دەکات.

 

وێنە گەورەکە: چاوەڕوان دەکرا ئەمڕۆ دادگەی باڵای فیدراڵیی عێراق، بڕیاری كۆتایی له‌بارەی سکاڵایەک دژی یاسای هه‌ڵبژاردنی په‌رله‌مانی كوردستان بدات، کە تایبەتە بە ژمارەى کورسییەکانی پەرلەمان، یەک بازنەیی و فرەبازنەیی هەڵبژاردن و ژمارەی کورسی کۆتاکان لە پەرلەمانى کوردستان، بەڵام جارێکی دیکە دانیشتنەکەی دواخست.

 

ئەوەی پێویستە بیزانیت: ئەمڕۆ یەکشەممە، 04-02-2024، دادگەی باڵای فیدراڵیی عێراق بۆ بڕیاردان لەبارەی سکاڵایەک لەدژی ژمارەیەک ماددەی یاسای هەڵبژاردنی پەرلەمانی کوردستان کۆبووەوە، بەڵام جارێکی دیکە لە دانیشتنەکەدا دادگە سکاڵاکەی یەکلانەکردەوە و بڕیاردانی لەبارەی یاساکەوە بۆ ڕۆژی 11ـی ئەم مانگە دواخست.

 

زانیاریی زیاتر: ئاڤا میدیا زانیویەتی، هۆکاری دواخستنی بڕیاردان لەبارەی سکاڵاکە، ئەوەیە دادگەی فیدراڵی داوای لە کۆمیسیۆنی باڵای سەربەخۆی هەڵبژاردنەکانی عێراق کردووە، لیستی کۆتایی تۆماری دەنگدەرانی هەرێمی کوردستان و چۆنیەتی دابەشکردنی کورسییەکان بۆ دادگە ئامادە بکات، ئەمەش بەمەبەستی تەواوکردنی دۆسییەکە و لە دانیشتنی داهاتوودا بڕیار لەبارەیەوە بدات.

 

باکگراوند: زیاد جەبار، سەرۆکی فراکسیۆنی یەکێتی لە خولی پێنجەمی پەرلەمانی کوردستان و ئامانج نەجیب شەمعوون، ئەندامى کریستیانەکان لە ئەنجوومەنى پارێزگاى سلێمانى سکاڵاکەیان لە دژی پێنج ماددەی یاسای هەڵبژاردنی پەرلەمانی کوردستان تۆمارکردووە، تایبەتن بە ژمارەى کورسییەکانی پەرلەمان، یەک بازنەیی و فرەبازنەیی هەڵبژاردن و ژمارەی کورسی کۆتاکان لە پەرلەمانى کوردستان.