دانیشتنەکەی دادگەی فیدراڵی لەبارەی کێشەی زەوییەکانی کەرکووک دواخرا

ئاڤا نیوز 

بڕیار بوو ئەمڕۆ دادگەی باڵای فیدراڵی لەسەر سکاڵای چەند کەسێک لەبارەی کێشەی زەوی و زاری چەند ناوچەیەکی پارێزگای کەرکووک كۆببێتەوە، بەڵام دانیشتنەكە بۆ مانگی تەمموز دواخرا.

لێدوانی فەرمی: محەممەد ئەمین، نوێنەری جووتیارانی کورد لە کەرکووک بە ئاڤا نیوزی گوت: كۆبوونەوەكە بۆ 21ی مانگی داهاتوو دواخرا، کە لەسەر سكاڵای چەند چالاكوان و كەسایەتییەك بوو، ئەوان داوا دەكەن بڕیارەكانی ژمارە 949 و 824ی "مەجلیسی قیادەی سەورەی بەعس" هەڵبوەشێنرێنەوە، چونكە بەپێی بڕیاری 949 دەستبەسەر زەوی 14 گونددا گیراوە.

ئەوەی پێویستە بیزانیت:كۆی گشتی ڕووبەری ئەو زەوییانەش پێكهاتوون لە 44 هەزار دۆنم زەوی، هەروەها بەپێی بڕیاری 824، دەستبەسەر زەوی نۆ گوندی سنوری داقوق دا گیراوە كە ڕووبەرەكەی پێكهاتووە لە 38 هەزار دۆنم زەوی.

باکگراوند: تائێستا دادگەی فیدراڵی عێراق، نۆ دانیشتنی سەبارەت بە كێشەی زەوییەكانی 14 گوندی سنووری سەرگەڕان و دووبز و پردێ و نۆ گوندی سنووری داقوق ئەنجامداوە. دوایین دانیشتن لە ڕۆژی 24-4-2024 ڕابردوو ئەنجامدرابوو.