کەنەدا لە هەولێر و بەغدا نوێنەرایەتی کەم دەکاتەوە و دایان دەخات

ئاڤا نیوز

 

كەنەدا دڵنیایی دەدات، سەڕەڕای بڕیاری كەمكردنەوەی نوێنەرایەتییەكانیان لە عێراق و هەرێمی كوردستان، بەڵام بەرپرسانی باڵیۆزخانەی کەنەدا لە عێراق چالاکانە لە پەیوەندییەکانیان لەگەڵ بەرپرسان و خەڵکی هەرێمی کوردستان بەردەوام دەبن.

وێنە گەورەكە: حکومەتی کەنەدا بڕیاری داخستنی نووسینگەکەی خۆی لە هەولێر و كەمكردنەوەی ستافی باڵیۆزخانەكەشی لە بەغدا داوە، حکومەتی هەرێمی کوردستانیش داوای پێداچوونەوەی بڕیارەکەی لە کەنەدا کردووە.
 
کاریگەری و لێکەوتەکان: هاونیشتمانییانی هەرێمی کوردستان بۆ وەرگرتنی ڤیزا و ڕەزامەندی خوێندن لە کەنەدا، سەردانی ئەو نووسینگەیەیان دەکرد و سوودیان لێ وەردەگریت؛ هاووڵاتییانی خاوەن وڵاتینامەی کەنەداش کارەکانیان لەو نووسینگەیە ڕایی دەکرد.

 

زانیاریی تایبەت: فەرمانگەی پەیوەندییەکانی دەرەوەی حکومەتی هەرێمی کوردستان، داوای لە وەزارەتی دەرەوە کەنەدا کردووە، پێداچوونەوەی بە بڕیارەکە لەبارەی داخستنی نووسینگەی باڵێوزخانەی وڵاتەکەی لە هەولێر بکات.

 
هۆکارە زانراوەکان: بڕیارەکە بەهۆی قەیرانی دارایی و نوێ نەکردنەوەی بەرنامەی ستراتیژیەتیی ڕۆژهەڵاتی ناوەڕاست دراوە؛ لە ماوەی ساڵانی (2016 - 2025) کەنەدا چوارملیار و 700ملیۆن دۆلاری بۆ وەبەرهێنان و وەڵامدانەوەی قەیرانەکانی ناوچەکە تەرخان کردبوو، ساڵی ئایندە ئەو پڕۆژەیە وادەکەی کۆتایی دێت و پلانی نوێکردنەوەیان نییە.

لێدوانی فەرمی: وەزارەتی دەرەوەی کەنەدا لە وەڵامی پرسیارێکی ئاڤا نیوز سەبارەت بە کەمکردنەوەی نوێنەرایەتییەکانیان لە هەرێمی کوردستان و عێراق ڕایگەیاند: تیمی نوێنەرایەتیمان کەم دەکەینەوە، بەڵام بەرپرسانی باڵیۆزخانەی کەنەدا لە عێراق چالاکانە لە پەیوەندییەکانیان لەگەڵ بەرپرسان و خەڵکی هەرێمی کوردستان بەردەوام دەبن.