ئاڤا ڕێژەی گەنمی وەرگیراو لە سایلۆی شارەکان ئاشکرا دەکات

ئاڤا نیوز

 

بەڕێوەبەری بازرگانیی دانەوێڵەی هەولێر ڕایگەیاند، چاوەڕێین بەغدا سیدی ناوی جووتیاران و بڕی گەنمەکانمان بۆ بنێرێت، لەسەر ئەو بنەمایە گەنم وەردەگرین.

 

وێنە گەورەکە: هەرچەندە ساڵی ڕابردوو بەغدا 500 هەزار تۆن گەنمی جووتیارانی وەرگرت، بەڵام بۆ ئەمساڵ وەزارەتی کشتوکاڵی هەرێمی کوردستان لەگەڵ بەغدا لەسەر نزیکەی 700 هەزار تۆن گەنم ڕێککەوتوون.

 

لێدوانی فەرمی: میران بەختیار، بەڕێوەبەری بازرگانیی دانەوێڵەی هەولێر بە ئاڤا نیوزی گوت: ڕۆژی 4-6-2024 قسەم لەگەڵ لایەنی پەیوەندیداری بەغدا کرد، گوتیان خۆیان لە وادەی وەرگرتنی گەنم ئاگادارمان دەکەنەوە، پارەی گەنمی جووتیاران بە قۆناغ دەنێرن و ئێستا زیاتر لە ملیارێک دینار خراوەتە سەر هەژماری ئێمە، بەڵام ئەم پارەیە کەمە. 

 

زانیاریی بەدەستهاتوو: لەو بڕە گەنمەی بۆ هەرێمی کوردستان دیاریکراوە، پارێزگای سلێمانی زۆرترین پشکی بەردەکەوێت کە 282 هەزار تۆن گەنمە، هەولێر بە پلەی دووەم دێت و بڕی 228 هەزار تۆن گەنمی بۆ دیاریکراوە، دهۆک بە پلەی سێیەم دێت و بڕی 189 هەزار تۆن گەنمی لێ وەردەگیرێت.

 

ئەوەی پێویستە بیزانیت: بۆ هەر تۆنێک گەنمی پلەیەک 850 هەزار دینار دیاریکراوە، پلەی دوو کەمتر لەو نرخە دەبێت، بەڵام ئەمساڵ گەنمی پلە سێ لە سایلۆکان وەرناگیرێت.