ئاڤا نیوز
وەزارەتی ناوخۆی ئێران لیستی ناوی ئەو بەربژێرانەی ڕاگەیاند کە ئەنجوومەنی چاودێری شایستەیانی پەسەند کردووە.
وێنە گەورەکە: لە خولی چواردەیەمی هەڵبژاردنی سەرۆکایەتیی ئێراندا، کە هەڵبژاردنێکی پێشوەختەیە و 28ـی حوزەیران دەکرێت، شەش بەربژێر کێبڕکێ دەکەن؛ ئەوانیش بریتین لە: مەسعود پزیشکیان، مستەفا پورمحەممەدی، سەعید جەلیلی، عەلیڕەزا زاکانی، ئەمیر حەسەن قازیزادە هاشمی و محەمەد باقر قالیباف.
زانیاریی زیاتر: لە ناو 80 کەسدا کە ناوی خۆیان بۆ بەربژێری تۆمار کرد، ئەنجوومەنی چاودێریی تەنیا شەش کەسی پەسەند کرد و بەمپێیە یەکێک لەم شەش کەسە دەبێتە سەرۆککۆماری داهاتووی ئێران.
هەریەک لەم شەش بەربژێرە لەنێو کۆماری ئیسلامیی ئێراندا پۆست و پێگەی دیار و بەرچاویان هەبووە و لە بوارە جیاوازەکاندا کاریان کردووە. لێرەدا بە کورتی پڕۆفایلەکانیان دەخرێنەڕوو.
مەسعود پزیشکیان
- لەدایکبووی مەهابادە و تەمەنی 70 ساڵە.
- پسۆپڕی پێشکەوتووی نەشتەرگەریی دڵە.
- پێشتر نوێنەری تەورێز، ئازەرشار و ئەسکۆ بووە.
- لە خولێکدا، جێگری یەکەمی سەرۆکی پەرلەمانی ئێران بووە.
- وەزیری تەندروستی بووە.
- سەرۆکی زانکۆی پزیشکیی تەورێز بووە.
- جارێکی دیکە بەربژێری سەرۆکایەتیی کۆمار بووە و کشاوەتەوە. جارێکیش ناوی خۆی تۆمار کردووە و شایستەییەکەی ڕەتکراوەتەوە.
مستەفا پورمحەممەدی
- لەدایکبووی قومە و تەمەنی 65 ساڵە.
- سەرۆکی ناوەندی بەڵگەنامەکانی شۆڕشی ئیسلامیی ئێرانە.
- ئەمینداری گشتیی کۆمەڵەی ڕۆحانییانی تێکۆشەرە.
- لە کابینەیەکی حەسەن ڕۆحانیدا وەزیری داد بووە.
- لە کابینەیەکی ئەحمەدی نەژاد وەزیری ناوخۆ بووە.
- سەرۆکی هەواڵگریی دەرەکی، یاریدەدەر و جێگری وەزیری هەواڵگری بووە.
- داواکاری گشتیی سەربازیی شۆڕش بووە لە ڕۆژئاوای ئێران.
سەعید جەلیلی
- لەدایکبووی مەشهەدە و تەمەنی 59 ساڵە.
- دکتۆرای لە بواری زانستە سیاسییەکاندا هەیە.
- ئەندامی ئەنجوومەنی ستراتیژیی پەیوەندییەکانی دەرەوەیە.
- ئەندامی ئەنجوومەنی دەستنیشانکردنی بەرژەوەندییەکانە.
- نوێنەری ڕێبەری باڵایە لە ئەنجوومەنی باڵای ئاسایشی نیشتیمانی.
- ئەمینداری گشتیی ئەنجوومەنی بااڵای ئاسایشی نیشتیمانی بووە.
- یاریدەدەری وەزیری دەرەوە بووە بۆ کاروباری ئەوروپا و ئەمریکا.
- جارێکی دیکە بەربژێر بووە و 11٪ـی دەنگەکانی بەدەستهێناوە.
عەلیڕەزا زاکانی
- لەدایکبووی شاری ڕەیە و تەمەنی 59 ساڵە.
- پڕۆفیسۆری یاریدەدەرە لە بواری پزیشکیی ئەتۆمیدا لە زانکۆی پزیشکیی تاران.
- سەرۆکی شارەوانیی تارانە.
- چوار خول ئەندامی پەرلەمان بووە.
- سەرۆکی ناوەندی لێکۆڵینەوەی پەرلەمان بووە.
- سەرۆکی دامەزراوەی بەسیجی خوێندکارانی زانکۆکان بووە.
- لە خولی پێشووشدا بەربژێر بوو، بەڵام لەبەرژەوەندی ڕەئیسی کشایەوە.
ئەمیر حەسەن قازیزادە هاشمی
- لەدایکبووی شاری فریمانە لە خوراسانی ڕەزەوی و تەمەنی 53 ساڵە.
- پزیشکی پسپۆڕی قوڕگ و لوت و گوێیە.
- یاریدەدەری سەرۆک کۆمار و سەرۆکی دامەزراوەی شەهیدە.
- ئەندامی بەرەی پایەداریی شۆڕشی ئیسلامییە.
- چوار خول ئەندامی پەرلەمان بووە.
- جێگری سەرۆکی پەرلەمان بووە.
- لە هەڵبژاردنی پێشوودا لەنێو چوار بەربژێردا چوارەم بوو، نزیکەی یەک ملیۆن دەنگی بەدەستهێنا، لەکاتێدا دەنگە پووچەڵەکان چوار ملیۆن دەنگ بوون.
محەممەد باقر قالیباف
- لەدایکبووی شاری تورقەبەیە لە خوراسانی ڕەزەوی.
- دکتۆرای لە جوگرافیای سیاسیدا هەیە.
- سەرۆکی پەرلەمانی ئێرانە.
- ئەندامی ئەنجوومەنی دەستنیشانکردنی بەرژەوەندییەکانە.
- سەرۆکی شارەوانیی تاران بووە.
- فەرماندەی هێزەکانی پۆلیس بووە.
- فەرماندەی هێزە ئاسمانییەکان بووە.
- فەرماندەی قەرارگای بونیاتنانی خاتەمولئەنبیا بووە.
- پێشتریش سێجار بەربژێر بووە، دووجار دەرنەچووە و جارێکیش کشاوەتەوە.
