بەرنامەی بەستنەوەی بیرەکان بە مۆلیدە ئەهلییەکانەوە جێبەجێ دەکرێت

ئاڤا نیوز 

بەڕێوەبەریی گشتی ئاو و ئاوەڕۆی هەرێمی کوردستان ڕایگەیاند، بەرنامەی بەستنەوەی بیرەکان بە مۆلیدە ئەهلییەکانەوە جێبەجێ دەکرێت.

وێنە گەورەکە: لە پارێزگای هەولێر زیاتر لە 140 گەڕەک هەیە، بەهۆی کەمی کارەبا بەشێکی زۆر لەو گەڕەکانەی کە بیریان هەیە، گرفتی کەمیی ئاویان بۆ دروست دەبێت. 

بۆچی گرنگە: بەجێبەجێکردنی بەرنامەی بەستنەوەی بیرەکان بە مۆلیدە ئەهلییەکانەوە، کێشەی کەمی ئاو لەو گەڕەکانەی کە ئاویان لەسەر بیرە چارەسەر دەبێت.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان، بە ئاڤا نیوزی گوت: بەرنامەی بەستنەوەی بیرەکان بە مۆلیدە ئەهلییەکان لە 2020 ەوە هەیە، بەڵام بەهۆی نەبوونی کارەبا ئێستا زیاتر لەو شوێنانەی هێڵی ئیفرازیان نییە کاری لەسەر دەکرێت، بەتایبەت دارەتوو، شاوەیس، بنەسڵاوە و هەندێک گەرەکی ناو شار.

زانیاریی زیاتر: لە پارێزگای هەولێر هەزار و 400 بیر هەیە، تا ئێستا 250 بیر بە کارەبای مۆلیدەکانەوە بەستراون، بەشێک لە بیرەکانیش کارەبای بەردەوامیان هەیە، ئێستا کار لەسەر ئەوانە دەکرێت كە ماون.