ئاستی گلدانەوەی ئاوی بەنداوەکان نزیکەی دوو ملیار مەتر لە پار زیاترە

ئاڤا نیوز

 

بەڕێوەبەری گشتیی بەنداوەکانی هەرێمی کوردستان ئاماژە بەوەدەدات، ئاستی ئاو بەراورد بە ساڵی ڕابردوو لە سەرجەم بەنداوەکان بەرزبووەتەوە.

 

وێنە گەورەکە: سێ بەنداوی گەورە و زیاتر لە 15 بەنداوەی بچووک هەن، توانای گلدانەوەی زیاتر 10 ملیار ‏مەتر سێجا ئاویان هەیە.

 

لێدوانی فەرمی: ڕەحمان خانی، بەڕێوەبەری گشتیی بەنداوەکانی هەرێمی کوردستان بە ئاڤا نیوزی گوت، "ئاوی گلدراوە لە هەرێمی کوردستان تاوەکو ئێستا بەراورد بە ساڵی ڕابردوو زیاتر لە ملیارێک و 600 ملیۆن مەتر سێجا زیادبووە".

 

ژمارەکان وادەڵێن: سێ بەنداوی گەورە لە هەرێمی کوردستان هەن، بەهۆی قەبارەیان زیاتر لەوانی دیکە پشتیان پێدەبەسترێت، کە پێکهاتوون لە دەربەندیخان کە ئەمساڵ ئاستی ئاوەکەی شەش مەتر و نیو، بەنداوی دهۆک 13.5 مەتر و بەنداوی دووکان 4.5 بەرزبووەتەوە.

 

بۆچی گرنگە: بەنداوەكان کاریگەری گەورەیان لەسەر كەمبوونەوەی ڕێژەی كەمئاوی و زیادبوونی سامانی ماسی و بەرهەمهێنانی كارەبا، كشتوكاڵ و ئاودێری هەیە.

ئەوەی پێویستە بیزانیت: لە ماوەی کابینەی نۆیەم چوار بەنداو لە سەرجەم پارێزگاکانی هەرێمی کوردستان دروست کراون، کە تێچوویان 45 ملیار و 55 ملیۆن و 779 هەزار و 650 دینار بووە و توانای گلدانەوەی 29.1 ملیۆن مەتر سێجا ئاویان هەیە.