نوێترین زانیاری لەبارەی ئاگرەکەی گوێڕ

ئاڤا نیوز

زیاتر لە 14 کاتژمێرە ئاگری پاڵاوگەکەی ڕێگەی هەولێر - گوێڕ بەردەوامە و زیانێکی زۆری لێکەوتووەتەوە.

چیرۆکی سەرەکی: کاتژمێر 08:30 خولەکی شەوی ڕابردوو  ئاگر لە پاڵاوگەیەکی نەوت و گاز لە ڕێگەی گوێڕ کەوتەوە، تاوەکو ئێستاش نەتوانراوە کۆنترۆڵ بکرێت.

زیانە سەرەکییەکان: تاوەکو ئێستا  10 کەس بریندارن و هەشت کۆگا و نۆ  ئۆتۆمبێل سووتاون و سێ لە ئۆتۆمبێلەکان هی بەرگریی شارستانین، بەهۆی بەردەوامی ئاگرەکە تاوەکو ئێستا زیانەکانی دیکە نەزانراون.

ئێستا چی ڕوودەدات: نزیکەی 40 تیمی بەرگری شارستانی هەوڵی کۆنتڕۆڵکردنی ئاگرەکە دەدەن و بەشێکی زۆری ئاگرەکە کۆنتڕۆڵ کراوە،  ئاگر تەنیا لە حەوزی خەزانەکان ماوە و پەرژینێک لە دەوری پاڵاوگەکە دروست کراوە، بۆ ئەوەی بۆ دەوروبەر تەشەنە نەکات.

لە پەیامنێرەوە: ڕزگار کۆچەر لە شوێنی ڕووداوەکە ڕایگەیاند، تاوەکو نەوتی ڕەشی ناو خەزانەکان تەواو نەبێت ناتوانرێت ئاگرەکە کۆنترۆڵ بکرێت. زیانە ماددییەکانیشی بە نزیکەی 9 ملیۆن دۆلار خەمڵاند.

 

گۆشەیەکی دیکە: بەشێک لە کۆگاکانی دەورووبەر کە تایبەتن بە نەوت و قیڕ، بەرهەمەکانیان لە ڕێگەی تانکەرەوە دەگوزانەوە بۆ ئەوەی لە مەترسی ئاگرەکە بیپارێزن.