زۆرترین قەبارەی خێزان لە باشووری عێراقە و كەمترینی لە هەرێمی كوردستان

دلێر حه‌مه‌

سەرژمێری ئه‌زموونی لە سەرجەم پارێزگاکانی عێراق بە هەرێمی کوردستانیشەوە کۆتایی هات، قەبارەی خێزانێکی مام ناوەند لە سەرجەم پارێزگاکان بریتی بووە لە شەش کەس.

وێنە گەورەکە: بڕیارە مانگی تشرینی دووەمی ئەمساڵ، سەرژمێری گشتیی لە هەموو پارێزگاکانی عێراق و هەرێمی کوردستان بەڕێوە بچێت.

لێدوانە فەرمیەكان: له‌كۆنگره‌یه‌كی ڕۆژنامه‌وانیدا زیا عەواد، سەرۆکی دەستەی ئامار له‌ وه‌زاره‌تی پلاندانانی عێراق ڕایگەیاند: 45 هەزار خێزان لە سەرجەم پارێزگاکان داتاکانیان کۆکرایه‌وه‌ و دەرکەوت 91%ی خێزانەکان لەلایەن پیاوانەوە‌ سەرپەرشتی دەکرێن.

لە لایەكی دیكەوە: عەبدولزەهرە هنداوی، گوتەبێزی وەزارەتی پلاندانانی عێراق بە ئاڤا نیوزی گوت:  ئه‌مرۆ قۆناغی دووه‌می سەرژمێریی ئەزموونی بە سەرکەوتوویی کۆتاییهات، ده‌ركه‌وت پارێزگاکانی باشوور زۆرترین تێکڕای قەبارەی خێزانیان هەیە.

ئەوەی پێویستە بیزانیت: سەرژمێرییەکە لە ماوەی 14 ڕۆژ لە 86 ناوچەی هەرێمی کوردستان و عێراق کرا و داتای 45 هەزار خێزان کۆکرایەوە، دەركەوت ڕێژەی ڕەگەزی نێر 50.1% ە، قەبارەی خێزانێکی مام ناوەند لە سەرجەم پارێزگاکان بریتی بووە لە شەش کەس.

 

زانیاریی زیاتر: قەبارەی خێزانێکی مام ناوەند پارێزگاکانی باشووری عێراق بریتی بووە حەوت کەس، پارێزگای سلێمانی کەمترین قەبارەی خێزانی هەبووە کە بریتی بووە لە چوار کەس.